Sulat Pastoral ibat king CBCP: In Catutuan Yang Patimaua Kecayu (Jn. 08:32)

 ING CATUTUAN YANG PATIMAUA KECAYU (Jn. 08:32) 

Ing Sulat Pastoral ning Capulungan ding Catolicong Obispos ning Filipinas (CBCP)

https://cbcpnews.net/.../the-truth-will-set-you-free.../

CAPATAD,

Ing capayapan nang Jesus ya sanang mandatila kecatamu ngan. Iyang sinabing: "Nung isundu yu ing pamamintu king cacung turu, tune raco pin canitang alagad cu. Ataruc ye ing catutuan, at ing catutuan yang patimaua kecayu" (Juan 08:31-32)

King pamamigaganaca tamu king aldo ning EDSA People Power Revolution ngening Caddua nang pulu't Lima ning Febrero, nung nu ya manalacaran ing capayapan king pamaniubli king kecatamung catimauan, pasibayu keng makisabi kecayu, nanu co man cule o bili king balen.

Balu ming tutung e malino ing dacal a bage, lacuas na king pamamuntucan balen. Miyayaliua tamu panlalaue. At bina keng magmalun king casalungsungang pangapitna ning kecatamung bangsa pauli ning politica. Bista man macanian, mananu na sanang ing capacanan ding sabla (common good) yang lubus tamung pigaganacan. Igalang taya ing metung at metung, e tamu payalimbuke, at pangilagan tamu ing manusga. Pantunan tayang mipnung sipagan ing catutuan. Daptan taya ing matulid, at irayu tamu ing e matulid ampon maroc.

Dacal la kecatamu ring bubusabus king catayang politica. Agcatan naca tamung Papa Francisco painturu king bayung capingangalipan king politica anting metung a matibe cayausan. Metung ya iti king pecamatas a aske ning lugud, pauli ning nasa da reti ing capacanan da ring sabla (Fratelli Tutti, #180). Dumurut ya ing yato nung alang politica? cutang na pa pin (cf. FT #176).

E mi paninapan ing angcaminan ya kecayu ing maulagang tungculan ning pamanialese king balen, pati na inh tungculan ning pamamuntucan. Ati ke keti ban munie maca-tau ampon maca-caladduang antabe, agpang king kekeng pangatuburang mipasiag king catutuan ibat king casalpantayanan.

MAYAYASDAP YA ING CATUTUAN

Malapit n'yang malapit ing alalan, at buri ming ipaganaca: carapatan ra't tungculan ding balang memalen ing magbotung mipnunh catimauan ban yang apaniadsad ing cayapan ampon capacanan ding sabla (Gaudium et Spes, #75). Dapot, bina caming maliligalig caring malantad ampon mayamlit a mamamaluctut, pamanibela, pamanialicut, pamanaguanta ampon pamanalipit king catutuan, calupa ning historical revisionism—pamamaluctut king casalesayan: pamipalaganap fake news ampon false stories: 'disinformation' —ing pamipacalat caring e matulid a balita o bala-balangcas a salese ban yang linlangan ing ucul ding tau, panapalan ya ing catutuan at manyirang dangal. Ati lu ring troll farms a palaganap king sakit ning calaraman.

Surian ta la ring kecatamung sarili. Mecad abe ta mu na naman caring palaganap king sakit ning calaraman, a binang lalaganap at papata king kecatamung consencia: paralisan ing aggiu tamung kilalanan ya ing Dios ampon igalang ya ing cayapan ampon catutuan. E tamu man acacamalayan, atin mu na namang 'salut ning calaraman' lacuas na caniting capanaunan ning social media. Tutu yang e bibiru ing bage iti.

King sulat a iti ala keng sasanladan nung e mu ing catutuan. Buri mi mung munie paganaca dikil king malino pamamaluctut king casalesayan dikil king Batas Militar ampon king Edsa People Power Revolution.

Banuang Labing Siam at Ualung pulu't Anam, mapilan no kecami ring casamac na ning CBCP. Mibandu caming 'Casulatan king Cauacasan ning Alalan', king fechang Calabi yang Atlu ing Febrero, banuang Labing Siam at Ualung pulu't Anam, dikil king matimid a kealan rang matulid ding bobotu, laganap ampon binang maragul a pamamisaling-botu, licas a pamakialam caring botu, pamanligalig, pamanalipit, terorismo ampon pamacamate. King capareung casulatan sinabi mi: "ing pamamuntucan a milucluc o mandatila upaya capamilatan ing calinlangan mangabaldugan yang ala yang dalerayang maca-tau." Ulinita, aduan ming lumaue cayu, ban kilatis ampon kimut, malinong e king pamipanadakit, nune capamilatan ding paralan a mapaum. At ita ing miliari. Ding memalen -ing NAMFREL, ding Computer Technician ning Comelec, ding Poll Officials - ding registrars, talaturu, magobra king govierno, lauit-lauit a caraniuang votantes cagum da ring pari at religiosos ampon religiosas, ing Radio Veritas ampon ding talapamalita kinimut lang mapaum. E ra aggiung alducan ing malantad a calinlangan ampon capamuraitan. Tikian de, cambe ring Officiales king Batasan, inh militas, ding Officiales ninh Comelec, ing carelang consencia. At ding capaliarian ilang peparas king EDSA (cf. Panig ninh CBCP king Cauacasan ning Alalan, banuang Labing Siam at Ualung pulu't Anam)

E mi ya pibala-balangcas ing capaliarian king casalesayan a miliari carin EDSA; nung e bunga ne ninh lugud king capara ampon casalpantayanan. Cambe yu, mistula na keng dake niti. Icayu ampon ing yatu inh mecatangal king mapayapang pamanalsa, a mengaintulid mayaus 'Upaya ring Memalen' (People Power). Ing mapayapang pamanalsa e ne geua ninh metung mung tau, ning metung mung partida, o metung mang cule. Tagumpe ne ninh mabilug a Balayan Filipino.

Dacal kecaming Obispos ding mecatangal king kealan nang catarauan ampon carocan ning Batas Militar. At mangga na ngeni, ring pangayalipit caring matulid ding tau, ding mayayasdap, ing pamanguracut, ing binang maragul a cautangan ampon pangabagsac ning economia ninh bangsa pauli ning dictaturia asno casalese pangasalese. Pasibayu, e mi la geua reti. Pacasulat la ngan reti king kecayamung casalesayan.

Maliligalig cami caniting pamamaluctut king catutuan ning casalesayan ampon ing cayalbulan mamura ampon sumira king memetung tamung catandanan capamilatan ning pamanasic caring calaraman ampon e ustung pamanialese. Tutu ya iting macapacaroc, pablasang lalasunan ne ing memetung tamung male at sisiran ne ing maca-tau rang panalacaran ding kecatamung balen.

Ing pamipapabusta king catutuan macasira yang bina kecatamu ngan, ampat ing panalacaran ning metung a mayap a balen ampon apaniualang pamamuntucan ya ing catutuan. Apaintulut ta mong ding kecatamung anac ampon ding cayanacan mituruanan lang calaraman? Aggiu tamu mong gauan ding calaraman ilang dalerayan ding batas ampon dinh pangapatupad da? Nanu mong maliari king metung a familia o aguman a e manalacaran king catutuan?

Caluguran cung Capatad, manalacaran tamu king catutuan. Tandanan tamu: ing cayapan a alang catutuan metung yang calinlangan. Ing casuyuan a alang catutuan metung yang pamanibela. Alang maging catalaruan nung alang catutuan. Anggiang ing lugud, nung alang catutuan, pamanibela ya mung panamdam. Ing alalan o nanu pa mng cararalanan a e manalacaran king catutuan tune yang calinlangan manga e man apicayaran.

 Asne calapit ing catutuan king catimauan (cf. Juan 08:32). Ing kealan galang king catutuan kealan yang galang king catimauan. Neng papabustan taya ing catutaun, papabustan taya ing tungculan tamung maliaring apicatiualan. Apasiag taya mo ing pamanguracut nung alang catutuan? Sucat tamung miyaddiang marap king catutuan busal tamu.

ING POLITICA NING CATUTUAN, CAYAPAN, CATALARUAN, AMPON CAPAYAPAN

Ulinita, ampon king laue king daratang a alalan, mamaus ke kecayu, Capatad —lacuas na ring Cayanacan, ban lang manono pacalauan dinh maliliari king kecatamung pamanarap king tune ampon matulid a balen. Makirake co king pamakitalamitan amñon pamanalastas. Makiramdam co caring kecong consencia. Magi cong detang taung mamili. Manalig ke kinh aggiu yunh taruc king ustu ampon mayap. Pagdulapan tamu ngan ing capacanan ning metung at metung. Ampon, king sala ning mayap nanh balitang Jesus, gasgas tamy king dalan ninh catutaun, cayapan, catalaruan ampon capatapan –e king dalan ning casakitan, pamanablas ampon carocan.

E tamu susucu king kecatamung pamandulap ampon pamaglualu kinh catutuan —capamilatan ninh sangcan ampon casalpantayanan, capamilatan ning pamagmasabal ampon pamanalastas king metung at megung, panalangin ampon dapat. Mica-capanaligan tamung manatilu king pamaniaul king carocan capamilatan ning catapan (Roma 12:21). Pisanmetungan naca tamu ngan sana ning catutuan.

Manene tamung panalangin ing manakit king Catutuan, nung e mu bucud i Jesus —ing Dalan ampon ing Bie (cf. Juan 08:31). Pablasang 'nung ati busal tamu ing Dios, ninu mong macasalangsang kecatamu?' (Roma 08:31).

Manigapu tamu para caring panalangin na't cayampunan ning Pacamalan tamung Indu, ing Indu ning Capayapan. Panuanan no ngan sana ning Dios a Lubus Mayupaya dinh kecatamung pamagcapilit ban yang miral ing catutuaj ampon cayapan, king laggiu ning Ibpa, ampon ning Anac, ampon ning Banal a Espiritu. Amen.

Para king Capulungan ding Catolicong Obispos keti Filipinas,

+ PABLO VIRGILIO S. DAVID, D.D.

Obispo ning Kalookan

Punbala ning CBCP

Ca-25 ning Febrero, 2022

(Linicas nang Cirílo Socórro: Sále ning Capasngauan, canitang Caddua nang pulu't Anam ning Febrero, banuang Adduang pulu't Adduang pulu't Addua, king ganap a Calabi Metung Adduang pulu't Ualu ning Cabengian —Maitines ning Caualu nang Domingo ning Caraniuang Panaun)