Nanu ya ing Oración?

Metung yang lacuas a mekilalang a panalangin ing Oracion a pangadian ding maldang Catolicos atlung ucdu aldo-aldo, magmula king canam na ning abac, king calabing adua na ning caugtuang aldo, angga na king canam na ning cabengian cambe ring mipapagdupical a campana. Ing lagiu na meangu ya king amanung Latin a "Angelus" a mangabaldugang angel, paganaca nang matimid kecatamu ning mismung panalangin ing macananu yang miagum i JesuCristo king kecatamung pangatau king Misterio ning Pamicatauan nang Tau. 

Pangadian ne ning Papa ing Oracion carin Plaza San Pedro balang aldo Domingo king caugtuang aldo. Pauaga ya namang mapilang amanu anting pamigunam king Mayap a Balita ning aldo ampon neng misan pausuc yang pamangamanu dikil caring miayaliuang casasagculan king mabilug a yatu. Misiuala la ring amanu ning Papa king mabilug a yatu king uli ning radio television ampon laganap a midarake king pamitalamitan king media. Macanian mu naman king balang pisamban, cumbentu, monasterio, escuela at balang pamibale-bale da ring familiang Catolico. 

Magmula king Panaun ning Pangasubling Mebie angga na ning Solemnidad na ning Pamanipa ning Banal a Espiritu, mipangadian ya ing Regina Coeli calibe ning Oracion. Pauaga na niting panalangin ing Pangasubli nang Mebie JesuCristo, ampon capara ning Oracion, mapupupus ya king pamangading Ligaya king Ibpa king macatlung ucdu.

Ing Oración 

Manungge : Ing Angel ning Guinu, pepabaluan ne ing Virgen Maria.

Pakibat: At kinagli ya lalang ning Espiritu Santo.

Manungge: Bapu Maria mipnu ca quing grasya ing Guinung Dios atiu ya queca, nuan ca caring sablang babai, nuan ya pa naman ing bunga ning atian mu i Jesus.

Pakibat: Santa Mariang Indu ning Dios ipanalangin mu queng macasalan, ngeni ampon nung camatayan mi na. AMEN.

Manungge: Ani cu alipan ning Guinu

Pakibat: Maliari cabud canacu anti ing guingcas mung amanu

Manungge: Bapu Maria mipnu ca quing grasya ing Guinung Dios atiu ya queca, nuan ca caring sablang babai, nuan ya pa naman ing bunga ning atian mu i Jesus.

Pakibat: Santa Mariang Indu ning Dios ipanalangin mu queng macasalan, ngeni ampon nung camatayan mi na. AMEN

Manungge: At ing mal a caduang Personas micatauan tang tau.

Pakibat: At mekisaut ya quecatamu.

Manungge: Bapu Maria mipnu ca quing grasya ing Guinung Dios atiu ya queca, nuan ca caring sablang babai, nuan ya pa naman ing bunga ning atian mu i Jesus.

Pakibat: Santa Mariang Indu ning Dios ipanalangin mu queng macasalan, ngeni ampon nung camatayan mi na. AMEN

Manungge: Ipanalangin mu kami, Oh Santang Indu ning Dios.

Pakibat: Ba ming apanangintuliran nabangnan ing pangacu nang Jesucristong Guinu tamu.

Manalangin Tamu

 Tapucanan mo sa pung gracia, Ginu ming Dios, ding caladua mi, at ampat qng pamamalita ning Angel kuilala mi ing pamicatauan nang taung Jesucristong Anac mu, uli na naman pu ning lasa na't camatayan qng Cruz, apakuiabutan mi neman sa pu ing ligaya ning pangasubli nang mebie. Alang-alang sa pu iti qng Ginu mi mu ring Jesucristo. Yanasa.

 

GLORIA PATRI

Ligaya king Ibpa, at king Anac, 

at king Espiritu Santo.

Antimo ing sadia nang ligaya, 

ibat king camumulan, 

ngeni't mangga man qng alang angga. 

AMEN.

 

(Sambitan taya macatatlung ucdu)

Marso 25, 2021

Binaldug na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king aguman ning DagísPisamban Kapampángan a midake at micalap para king mialiwang istorya at panalangin ning:

© Maria: Ing Mialiwang Aske at Panamdam

*Sidia ne ning #DagísPisambánKapampángan

Meangu king mialiwang istorya ibat king

Dispu Kecatamungan!