Ing Solemnidad Nang San Jose, Ing Esposo Ning Nuan a Virgen Maria

19 MARSO, 2022 | ING SOLEMNIDAD NANG SAN JOSE, ING ESPOSO NING NUAN A VIRGEN MARIA

Ya ing asaua nang Mariang Indu nang Jesus ampon ing macatuldu nang ibpang Jesus agpang king batas ding Judios. I San Jose netung yang uliran ning cababan lub ampon capamintuan king caburian ning Dios. Penaluntunan no ring tuntunan ning Dios, a keang binie capamilatan ding angeles caring keang paninap, at saca ne inuli i Mariang mabuctut na king keang pibale-bale ban nang maging asaua, kimbilan ne ampon i Jesus king pangasapuac na carin Bethlehem capamilatan ning pamamainturu ning carelang familia king Ejipto, layun nong biniayan capamilatan ning keang capanintunan anting anluagi carin Nazareth.

Metung yang caraniuang talapagobra i San Jose bista ma't mituntun ya king sugi nang daying David. King caburian ning Lubus Mayupaya mitalaga yang magi nang esposo ning Indu ning Dio. Ing matas nang privilegi makikilala ya king metung mung cataya, "Ibpa nang Talaingat Jesus". Ditac ya mu asabi inh Banal a Casulatan liuas mu ketang macatuliran yang tau —metung a pamipasiag a dirikil king macananu ya catapat king pamamintu king matas nang pangapili anting cambilan ampon talaingat ding mangaulaga nang bandi ning Dios keti sulip, di Jesus ampon María.

Babie ne ning Banal a Casulatan ing e palac a pamanlarauang asna catas cang Jose: ya ing pangayaus nang taung "macatuliran". Ing pangabucud king anti keni migit ya dirikilan liuas king catapatan king pamamayaran picautangan. Neng sasabian ning Banal a Casulatan king ing Dios "panuliran" ne ing metung a tau, mangabaldugan yang ing Dios, ing lusuc banal o "macatulirang" dili, yayaliua ne aske ing tau ban yang macanabang aggiang macananu king sarili nang cabanalan ning Dios, iniasa't tutung "matulid" king luguran ne ning Dios. King malagguang salita, e ya makibiru ing Dios, king pakiuari mong calugud-lugud tamu aggiang ali man.

King bangsag a "matulid" ya i Jose, buri nang sabian ning Banal a Casulatan king metung yang taung tutung laus king nanu mang burian nang parapat kea ning Dios. Megi yang banal king pamamuclat nang ganap king keang sarili king Dios at ing kegana-gana kecata' neng apakiuari. Isipan nu ne mo itang uri ning lugud a pepaliaring paglolon ne't paniambutan i Maria, ampon ing calalaman ning lugud a piracayan da king carelang pamiyasaua. 

King KEALAN nang sinabi king Banal a Casulatan, yang DECALAN ding keang depatan... Yan i San Jose, ing patutu ning casebiang ingles a: "Action speaks louder than Words", tara pigunaman tala ring keang cayapan caring keang depatan:

01. ING CAPANALÍGAN KING DIOS

Anting camumulan, isipan tamu king atin tamung paglolon oneng asno caracal ding maglolo caya; nanung daptan mu? Lacuas yang maragul a sagcul iti para cang San Jose, uling metung ya caring micacaracal a bisang makiasaua cang Maria... Caimposible ne? 

Dapot atin yang tangca ing Dios cang San Jose, ya ing pepasampagang lirios king tucud na, at iti ya ing tanda ning sucat nang pakiasauanan Maria. 

Keting capaliarian panagcat na kecatamung San Jose, ing gauan tamu ing sabla tamung agiu at manalig king Dios ban nang papanagumpen iti.

02. ING PAMIGAGANACA CARING ALIUA

Ituki taya ing pamagdala nang tau ning Virgen Maria. Ica nanung gauan mu nung ing palsintan mu mabuctut ya at e me pa anac ing daralan na? I San Jose uling matulid yang tau at pigaganacan na ing pangasalbag na marine ning keang Esposa, tinangca nang cauanian ne ing Indung Maria.

Dapot atin yang tangca ing Dios cang San Jose, ya ing pepaninap kea king e ne sucat cauanian ing Virgen pauli ning ing daralan na Anac ne ning Dios, at caniting pamipatilip mipasno ya i San Jose king keang pangabalisa. 

Keting capaliarian panagcat na kecatamung San Jose, ing migaganaca caring aliua anggiang masakit ca lub carela, lauen ta mo, ya pang megi nang Talaíngat ning Caduang Persona!

03. ING PAMANLUALU CARING ALANG ACARAPAT

Nanung gauan mu nung atin magnasang macamate king anac mu? Ing metung a Angel pepatilip ya cang San Jose ban lang cararagling macatacas king ligalig nang Arinh Jerodes.

Iti depatan ne ning Dios, capamilatan na niting capaliarian mebantug ya i San Jose anting Talapanlualu ning Santa Iglesia! Isipan mu na mo, icua neng apangambil ing Anac ning Dios capamilatan na niti!

Keting capaliarian panagcat na kecatamung San Jose, ing sucat tamung pairalan ing catuliran ampon catutuan caring mistula tamung caparalanan anting Cristianos ban tamung macapakiapus kea.

04. ING PAMANLINGAP CARING PACAMALAN TAMU

Iniang acabiusan de ri San Jose ing ligalig nang Aring Jerodes, pepainturu la Nazaret ban reng aparagulan carin ing musmus a Jesus. 

King capamilatan ning pamananluagi nang San Jose, milalabas ya ing Banal a Familia king aldo-aldo, at caniti mekilala ya ing Guinu anting Anac ning Anluagi! Nung ing tatang miningat kea asadsad ne king aldo-aldo king anggang agiu na, ing Guinu naman sasadsad naca tamu aldo-aldo ban maging banal.

Keting capaliarian panagcat na kecatamung San Jose, ing lingápan ta la ring kecatamung pacamalan caring sara-sarili tamung dapat ban tamung macasadsad calupa ning Sagrada Familia.

Careting depatan nang San Jose, apakiabutan nang painauang matula uling atiu la siping na ring Sugi ning Banua, ing Indu at Reina takung ing Virgen Maria ampon ing Guinu tamung JesuCristo, ing Ari ning Meto Siclúban.

Ngeni magtagulaling tamu cang San Jose, ban king keang casaupan, apakiabutan tamung mapus caring keang cayapan:

Bápû San José, Talaíngat ning Talapanatbus, Espóso ning Nûan a Virgén María. Kécá ne pigcátiuálá ning Dios Ibpá ing Bugtung nang Anac. Kécá ya migcátiuálá i María; cambé mu miliári yang táu i Crísto Jesús. Cágum ning Guinú ming Jesús ampon ning Nûan a Indû: párangalan daca cambé ning taimtim a lugud ampon pámiparangal. Písimburí mí ngéning aldó ing magí cang kécaming ibpá, kécaming talaíngat ampon talapanluálû.

Pepaintulútán na cami ning Dios Ibpá ban magmasúsí caníting banuang páca-taguláling king kécang dangálan antimúrin ing matúlâng Calimang Dálang banuá ning Cristianísmo king kécaming tibûan.

Cambé ring mitutúlâng púsû, kikilalánan daca anting maragul nang cálam kécami ning Dios bán maging kékeng cayantábe, talaturû, píalimbauánan ampon talapanluálú caníting banuá ning Jubiléo.

Daraláuan daca bán itaguláling mi ya ing kékeng balayan, ing Capulúngan ning Filipínas, ding kécaming diócesis, parróquia ampon familia. Cambé ning lugud mu anting ibpá ampon ning kécang calingápan biniáyan mé ampon bélangcas ing bié ning Banal a Família carin Názaret.

Ipánigapú mi kéca king mipnûng capacumbabân ing panuánan mú ing sablá ming capagálan at saupan mu caming mamalangcas king Capulúngan, ing catáuán nang JesuCrísto, king mapamintûng casalpantayánan, masigásig a lugud ampon matíbe capanáyan king malugud ming Ibpá. 

Mísadiá cang paráti bán makiramdam ampon mamintû king caburîan ning Ibpá ampon pigluálû mé i Jesús caring sablâng casásagcúlan. Icábus mu cami king sablâng cáligalígan a manyírâ caring ablas ning Evangélio ampon caturûánan king kékeng tibûan. Ipagluálú mu cami ngan cábâng cacayarapan mi la ring é mayayákit ampon mayayákit a casakítan king kékeng cácarinan.

Pánibálá mi la kéca ring sablá ming cayaduanan ampon capagnasân a magdala kécami paintúrû king caligtásan. Pánibálá mi la kéca ring kékeng familia ampon ding sablâng ibpá bán malliári lang tutú king carélang cayausan anting salamín ning lugud na ning Ibpá ming atiû banua. Pánibálá mi la kéca ring sablá ming cararaptan bán sumáup caring capatad ming atiû king bílî ning casakítan. Kéca, Ó San José, caibat di Jesús ampon María, tataguláling mi la ring catáuan mi ampon caladuâ, king sablâ mi ampon atin cami.

Ó San Jose, pákit m'yá naman sána ing kécang saríli kécami anting ibpá. Tairan mu cami king dálan ning bié. Ipayábut mu kécami ing grácia, pacalúlu ampon sícanan, at ipagluálú mu cami king sablâng maroc. Yanásâ.

ITE AD IOSEPH!

LUID YA I SAN JOSE!