Ing Sagudsud Nang Cayaduanan Papa Francisco King Pamanalangin Ampon Pamag-Ayunu Para King Ucrania

ORATIO PRO UCRAINA | ING SAGUDSUD NANG CAYADUANAN PAPA FRANCISCO KING PAMANALANGIN AMPON PAMAG-AYUNU PARA KING UCRANIA

"Bina yang menalamtan ing cacung pusu king pangabina ning cabilian carin Ucraina. Pasubali caring diplomaticong pamagcapilit caring milabasan a paruminggu, lubus lang mangabayat a capaliarian ding pesibuclat. Calupa cu, dacal ning tau king meto yatu ring manamdaman pamagsalbat ampon pamagmasabal. Pasibayu, maliligalig ya ing capauman ding sabla pauli ring nasa ding misusumangid a partido king politica. Buri cung mauad caring makitungculan king pamamuntucan balen ing misuring matactac caring carelang consencia arapan ning Dios, a Dios ning capauman at e ning pamakilaban; a Ibpa ring sabla, e mu ring mapilan, a magnasang mipamicacapatad tamu at e ing micacasalang. Ipanalangin cung patugut la ring partidos a pepasari caring sanu pa mang pangimut a macapasari pang binang pamagcacasakit caring memalen, macabual parang pangayatiu pilatan ding bangsa at magdalang casiran king batas ning meto yatu.

At ngeni, mamauad cu caring sabla, parang talasalpantaya man o ali. Tiru nang Jesus kecatamu ing mipapakibatan ya ing maroc nang kealan panamdam ning pamipanasakit cambe ring sandata ning Dios, cambe ning pamanalangin ampon pamag-ayunu. Agcatan co ring sablang gauan ya ing tutuking Caddua ning Marso, ing Miercoles ning Abu, anting Aldo ning Pamag-ayunu para king Capauman. Aggiagan co ring bininiagan ing itagulaling la king macabucud a paralan ring carelang sarili king nasolung pamanalangin ampon pamag-ayunu king aldo ita. Cambilan ne sana ning Reina ning Capauman ing meto yatu ibat king deuacan ning pamakilaban."

— Ibat king Banal a Papa, Papa Francisco, carin Roma, canitang Mecatlu yang Atlu ing Febrero: Capigaganacan cang San Policarpio, Obispo ampon Martir

PANALANGIN KING ALANG CASALAT-SALATANG BANAL A MARIANG VIRGENG REINA NING CAPAUMAN

O Casantu-santusan ampon Alang Casalat a Virgen, Indu nang Jesus ampon malugud ming Indu, king pangapaliari mung keang Indu, apakiracayan me ing pamag-ari na king sicluban. Pisiag de ring manula ampon ding angeles anting Ari ning capayapan. Cambe ning malugud a panamdam caring kekeng pilubluban pupurian daca't parangalan anting Reina ning Capayapan.

Ipanalangin ming ingatan na ke sana ning kecang cayampunan pati na ring sablang tau ibat king pamicasama ampon pamisagsagan, at ituntun mo ring kekeng pusu caring dalan ning capauman ampon catalaruan a tiru na't pematutuanan ning kecang Anac. Aduan mi ya ing calingapan mung anting indu para king Banal a Papang gugusal para king icametung ring bangsa. Pagdulapan mi ya ing kecang antabe para king kekeng punbala ampon caring aliuang mamuntucan cabang panigobran da ing capayapan keti sulip.

O Maligayang Reina ning Capauman, pagcalaman mu caming capayapan caring kekeng pusu, cametungan caring kekeng familia ampon capauman king meto yatu. O Alang Casalat a Indu, anting patulunan ning pacamalan ming bangsa, antabayanan mu cami't cambilan cambe ning lugud mu anting indu.

YANASA.

Dururup keng payampun keca, O Casantu-santusan nang Indu ning Dios. E mu sana pisusubali ing aclis ming caministilan, nune icabus mu keng parati caring sablang caligaligan, O maligaya't canunuanan a Virgen. Yanasa.

Casantu-santusan a Maria,

REINA NING CAPAYAPAN:

Ipanalangin me ing Ucraina!