Ing Dapat Ning Pamagtagulaling Caring Bangsang Rusia Ampon Ucrania King alang Casalat-Salat Nang Pusu Ning Nuan a Virgen Maria

ING DAPAT NING PAMAGTAGULALING CARING BANGSANG RUSIA AMPON UCRANIA KING ALANG CASALAT-SALAT NANG PUSU NING NUAN A VIRGEN MARIA 

Parala ne ning Vaticano caring obispos king mabilug a yatu ing panalangin a panimunan nang Papa Francisco king ganap a Calima ning Gatpanapun king Oras ning Roma, king Caddua nang pulu't Lima ning Marso para king pamagtagulaling king Ucrania ampon Rusia king Alang Casalat-salat nang Pusu ning Virgen Maria, carin king Basilica nang San Pedro, Ciudad Vaticano.

Lauan taya ing mabilug a panalangin a payabut ning CNA at linicas na king Amanung Sisuan Cirilo Socorro: Sale ning Capasngauan para king DagísPisambán Kapampángan:

ING DAPAT NING PAMAGTAGULALING CARING BANGSANG RUSIA AMPON UCRANIA KING ALANG CASALAT-SALAT NANG PUSU NING NUAN A VIRGEN MARIA 

O MARIA, Indu ning Dios ampon Indu mi mu naman, caniting panaun ning cayalbulan dururupan daca. Anting kekeng Indu, caluguran mu ke't kilala: ni ing sanu mang capigaganacan ming lub e miyamlit-amlit keca. O Indung Mapamacalulu, caralas mi yang apipilasan ing calingapan mung mipnung pamanantabe ampon ing pangayatiu mung mipnung capayapan! Ala cang patnang tataid kecami painturu cang Jesus, ing Principe ning Capayapan.

Dapot menalandang cami king gasgas ning capayapan. Acalimbatauan mi ya ing turung krkeng abalu ibat caring calingasngasan ning milabas a panaun, ing sacrificio ding sangyutang taung miragusgus king parang ding adduang labanan keti sulip. Pebustan mi la ring pamagtagulaling a kekeng pengacu anting metung a balen ding bangsa. Penganiaya mi ya ing paninapan rang capayapan ding sabla ampon ing capanayan ding cayanacan. Dinagul keng mengasna king caimut, pigaganacan mi mu ing sarili ming bangsa ampon ing carelang capagnasan, dinagul keng alang masabal at meyablut ke king sarili ming macasariling pamangailangan ampon capigaganacan. Pinili ming noluan mi ya ing Dios, ban keng numaua caring sarili ming paninapan, ban keng sumulung king capalaluan ampon carasigan, ban lang alipitan ding bie ring alang sala at tipunan lang dacal a dacal ding sandata. Ticnangan ming magi rang talasaup ding capara ming tau ampon talalingap ring kekeng pibale-bale. Lesac mi ya ing mula ning labuad cambe ring labanan ampon uli ring kekeng casalanan ayaspac mi ya lub ing Ibpa ming mayupaya, a magnasang mipamicacapatad cami. Dinagul keng alang masabal kenu man at king sanu man nune mu king kekeng sarili. Ngeni mamaclis keng mipnung camarinayan: Patauaran mu cami, O Guino!

O Casantu-santusang Indu, busal ning lingasngas ampon pamicacasala, busal ding casakitan mi't keinan, busal ning misterio ning carocan —ya ing deuacan ampon labanan, paganaca mu kecami king e na ke capilan man paimburisan ning Dios, bagcus manatili yang macalaue kecaming mipnung lugud, parating macasaddiang mamatauad kecami at subling mibangun king bayung bie. Binie naca kecami ampon ing Alang Casalat-salat mung Pusu anting sabtungan para king Capulungan at para king meto ketauan. Pauli ning malam nang caburian ning Dios, manatili cang cayabe ming parati; aggiang caring asna calingasngas a penandit king kekeng casalesayan, ati ca carin ban mu keng antabayanan cambe ning malambis a lugud.

Dururup ke ngeni keca at cacatuc king pasbul ning kecang pusu; [pablasang] ike ring anac mung pacamalan. King balang panaun pakilala me kecami ing kecang sarili, ban mung keng ausan magbayu lub. Caniting marulum a penandit, saupan mu cami at pagcalaman mu keng casngauan. Yagcas mung pasibayu: "Ala cu uari keti, acung kecang Indu?" Icang maliaring macacalag caring bucnul ding kekeng pusu ampon ning panaun a iti; [inia] keca ke manalig. Abibitasa mi, lacuas na caring penandit ning cayalbulan, ing e ca magmaclac-maclacan king kekeng cayaduanan manga datangan mu ke cambe ning casaupan.

Ya na pin depat mu king Cana carin Galiea, iniang memilatan ca cang Jesus at depatan ne ing mumuna nang mala. Ban meng apapandatilan ing tula king capagmasusian ning casal, ngamu kea: "Kegisanan lang alac" (cf. Juan 02:03). Ngeni, O Indu, pasibayuan mo retang cataya at itang panalangin, pablasang king kekeng panaun kegisanan keng alac ning capanayan, keyalan keng tula, at kecupasan keng pamicacapatad. Acalimbatauan mi ya ing kekeng pangatau at bilagsac mi la ring calam ning capayapan. Biclat mi la ring kekeng pusu king pamipanasakit ampon casiran. O caragul mi caministilan king casaupan mu anting Indo!

Ulinita, O Indu, tingiran mu ing kekeng panalangin. O Batuin ning Dayatmalat, e mu ke paburen malumud king siggua ning labanan. O Caban ning Bayung Casunduan, uyaban mu keng gauang cararaptanan painturu king capaglarinan. O Reina ning Banua, ibalic me keti sulip ing capayapan ning Dios. 

Idayu mu ing pamicasama ampon ing cau ning pamagvengansa, layun ituru mu keng mamatauad. Itimaua mu ke king labanan, cambilan me ing kekeng labuad ibat king ligalig ding sandatang nuclear. O Reina ning Banal a Rosario, patalastas mu kecami ing pamangailangan ming manalangin ampon lugud. O Reina ning Familia ring Tau, ipakit me caring sabla ring dalan ning pamicacapatad. O Reina ning Capayapan, payabut mu ing capayapan king kekeng labuad.

O Indu, tagkilan no sa' ning malumbe mung aclis ding mangasias ming pusu. Ding luang bibu mu para kecami ila sa'ng pasagiuang pasibayu caniting batis a kelangian pauli ning kekeng sucal a lub.

Busal ding alti ding sandata, ing kecang panalangin ya sa'ng papaliari kecaming migaganaca para king capatapan. Ing panagkil mu anting Indu ya sa'ng mangasno caring lalasa ampon manginlag king uran ding payacbung king labanan. Ing caul mu anting Indu ya sa'ng mamatula caring mengapilitan maco caring carelang pibale-bale ampon king balen rang tibuan. Ing Mipamalungcutam mung Pusu ya sa'ng tagkil kecami king lugud manga muyab kecaming muclat caring kekeng pasbul layun lumingap caring capatad ming menasakit at mengapaimburisan.

O Casantu-santusan nang Indu ning Dios, king panalacad mu lalam ning cruz, panakit nang Jesus king alagad a ati siping mu, ngana: "Nio ing anac mu" (cf. Juan 19:26). King anti keting paralan picatiuala ne keca ing balang metung kecami. Ngana king alagad, ampon king balang netung kecami: "Nio ing Indu mu" (v. 27). O Indu ming Maria, pagdulapan mi ngening pasalangian raca caring kekeng bie ampon king kekeng casalesayan. Caniting panaun, ing maina ampon migugulung ketauan yang cayantabe mu king panalacad lalam ning cruz, mangailangang icatiuala ya ing keang sarili keca ampon, capamilatan mu, itagulaling ya ing keang sarili cang Cristo. Ding memalen Ucrania ampon Rusia, a malsinta keca cambe ning e mu nanung lugud, dururupan raca ngeni, bista't man panibuc ning kecang pusu ing lugud carela ampon para caring taung mengamate pauli ning labanan, danup, kealan catalaruan ampon calucan.

Inia, O Indu ning Dios ampon Indu mi mu naman, masusi mi lang tatagulaling king Alang Casalat-salat mung Pusu ding kekeng sarili, ing Capulungan ampon ing meto ketauan, lacuas na ing Rusia ampon Ucrania. Tanggapan me iting cararaptanan a lalapit ming mipnung capanaligab ampon lugud. Ipagcalam mung mapupus na ing labanan at laganap ne ing capayapan king mabilug a yatu. Ing "Fiat" a menibat king kecang pusu yang memusni king casalesayan para king Principe ning Capayapan. Panaligan mi king, capamilatan ning kecang pusu, sunlag yang pasibayu ing capayapan. Tatagulaling mi ya keca ing paintungulan ning familia ning meto ketauan, ding pamangailangan ampon pagdulapan ding balang tau, ding pigaganacan na't capanayan ning yatu.

Capamilatan ning kecang pamamilatan, mitapuc ya sa' ing pacalulu ning Dios keti sulip ampon ing malambis nang sunis ning capayapan yang pasibayung mandatila king kekeng capanaunan. O Indu ning "Fiat, nung kenu ya tinipa ing Banal a Espiritu, ibalic mu kecami ing capauman a manibatan king Dios. Ica sana, O kekeng "mabie sibul ning capanayan," ing pasagiua caring mengalangi ming pusu. Micatauan yang tau i Jesus king kecang sepupunan; saupan mu keng maniese king paniulung ning pamisanmetung. Ticluanan mo canita ring dalan na ning kekeng labuad; tairan mu ke ngeni king dalan ning capayapan.

YANSA.

INDU NING CAPAYAPAN:

— IPANALANGIN MU CAMI!

(Meyari pangalicas king ganap a Alas Otcho Sincuenta y Cinco ning Abac, canitang Caddua nang pulu't Atlu ning Marso, banuang Adduang pulu Adduang pulu't Addua.)