Catekismo Dikil Careng Angeles

CATECISMO DIKIL CARING ANGELES

Meangu ibat king Catecismo ning Capulungan Catolico: 

Ing pangayati ring angeles 

— camatutuanan ning casalpantayanan.

Ing pangayati ring espiritual, alang aske taung lelangan a maralas nang ausan ning Banal a Casulatan anting “angeles” catutuan ya king casalpantayanan. Cauangis ne lino ning Patutu ning Casulatan ing cametungan ning Casanayan.

Ninu la mo?

Nganang San Agustin: “ ‘Angel’ ya lagiu ing carelang casuyuan, at e ing carelang aske. Nung panintunan me ing lagiu ning carelang aske, ya ing ‘espiritu’; nung namang panintunan me ing carelang casuyuan, ya ing  ‘angel’. ” Cambe ning mabilug rang aske, talasuyu no't talapabalu ning Dios ring angeles. Pauli ning “parati reng atatangalan ing lupa ning cacung Ibpang atiu banua” ila ring “mangasicanan mamintu king keang sasabian, makiramdam king siuala ning keang amanu”.

Anting tutung espiritual a melalang atin lang cabiasnan ampon caburian ding angeles: sarili la’t alabg anggang melalang, lalagpus king caganapan caring sablang mayayakit a melalang, cabang babie yang patutu ing camalan ning carelang ligaya.

I Cristo “cambe ring keang angeles”

I Cristo ing pecalibutas ning labuad ding angeles. Ila ring keang Angeles: “Potang datang yang maligaya ing Anac ning tau, cambe ring sabla nang angeles.” Bandi na la pablasang melalang la capamilatan na ampon para kea: “ampat kea melalang la ring sablang bage carin banua ampon keti sulip, ding mayayakit ampon e mayayakit, anggiang ding tronos o ring dominaciones, ding prinsipalias o ring upaya — melalang la ring sablang bage capamilatam na ampon para kea.” Tutu no pa mu ring bandi pablasang geua na lang talapabalu ning magligtas nang tangca: “E la mo ngan susuyung espiritung mitubud ban sumuyu, alang-alang caring sucat makiabut caligtasan?”

Atiu no ring angeles iniang camumulan ning pamaglalanh ampon king kecaban na ning casalesayan ning caligtasan, papabalu caniting caligtasan king malaut man o malapit ampon susuyi king caganapan na ning divinong tangca: Ilang miniara king paraiso king labuad; ilang mengambil cang Lot; ilang sinagip cang Hagar ampon caring keang anac; ilang menatili lele nang Abraham; ilang tinalamitan king Batas caring carelanh casuyuan; ilang pesiuna king Balen ning Dios; ilang pepabalu caring kebaitan ampon cayausan; ampon minantabe caring profetas, ban maniambitlang mapilang alimbaua. Catataulian, ing angel Gabriel yang pepabalu king pangabait ning Magsadia ampon ning cang Jesus mismu.

Ibat king Pamicatauang Tau anga kinh Pamaitas Banua, ing bie ning Amanung micatauang tau pacapadurut ya king capaniamban ra’t casuyuan ding angeles. Iniang ing Dios “dela na keti sulip ing pangane, nganang sasabi: ‘Bustan yong samba kea ring sabla nang angeles ning Dios.’ ” Ing dalit rang capurian king pangasapusc nang Cristo ala yang patnang misusundu king capurian ning Capulungan: “Ligaya kinh Dios king cacatas-catasan!” Kimbilan re I Jesus iniang musmus ya, siyuan de king ilang, pesicnangan de king pamanañangin na king mula, iniang miligtas ya sa’ caring gamat ding keang casalang anti na mo ing Israel. Pasibayu, ding angeles ding “menaral” capamilatan ning pamipasiag king Mayap a Balita ning Pamicatauan nang Tau ampon Pangasubli nang Mebie. Ati la naman king pamagbalic nang Cristo, a ipabalu ra, ban lang macasuyu king keang pamanucum.

Ding angeles king bie ning Capulungan

Antimurin, menabang ya ing cabilugan nang bie ning Capulunhan king macapagmulala ra’t masicanang casaupan ding angeles. 

King keang pamagmasusi, makiagum ya ing Capulungan caring angeles ban samba king macatlung banal a Dios. Aduan no ring carelanh casaupan (king “Supplices te rogamus...” [“O Lubus mayupayang Dios, ipanalangin ming inh kecang angel…”] ning Tuntunan Romano; king “In Paradisum deducant te angeli…” [“Idala raca sana king Paraiso ring sablang angeles…”] ning capagmasusian king pamangutcut. Pati king “Himno Querubin” ning Capagmasusiang Bizantino, pagmasusian no ring capigaganacan ding mapilang angel, antimo ri San Miguel, San Gabriel, San Rafael, ampon ding Angeles a Talaíngat.

Ibat king camusmusan ning bie ninh tau angga na king camtauan na pacapadurut ya caring mimingat rang calingapan ampon pamamilatan. “Siping ding balang talasalpantaya atiu lele ra inh metung a angel ban maglualu kea’t tumaid painturu king bie”. Keti pa sulip makirake ya ing bie Cristiano capamilatan ning casalpantayanan king nuan rang coro ding angeles at ing tau miagum ya king Dios.