Santa Teresa Ning Calcutta

SANTA TERESA NING CALCUTTA: MADRENG LILINGAP CARING MALUCA, BANAL A KING DIOS PEPALIGAYA

Balang Septiembre 05

I Santa Madre Teresa ning Calcutta, ing mekilalang malating babai king meto yatu pauli ring keang cararaptan para caring maluca pa caring maluca, mipasiag ya anting Beata canitang Calabi yang Siam ing bulan ninh Octubre, banuang Aduang pulung libu't Atlu. Caring pacatagun canita dalan dalan lang Misioneros ning Lugud, ing orden a keang telacad canitang banuang Labing Siam a libu't Limang pulu, anting metung a religiosong comunidad king carelang diocesis. Ngeni, pacayagum la na man king catipunan ding palpigunam a micacapatad, ampon ding mapilang orden ding pari.

Misapuac ya caring miasauang Albiniano (ngening mayayaus Skopje, Macedonia), i Gonxha (Ines) ing bungsu caring mitagan a atlung anac. Caring mapilng panaun, mibie-bie yang manaua ing carelang familia, at misaplala ya ing negosio nang pamananluagi ning keang ibpa. Dapot mibayu la bie king cabucas king e pangaran nang camatayan ning asias ning carelang familia

King pamagaral nang Ines king pipamantasang publico, mekiagum ya king metung a Catolicong aguman layun pepalto yang malalablab a capagnasan caring pangatuburang mamalayan. Iniang Labi yang Ualung banua, mekiagum ya caring Micacapatad a Loreto ning Dublin. Banuang Labing Siam a libu't Aduang pulu't Ualu iniang memun ya king keang indu king tauling ucdu saca ya pepainturu king metung a bayung carinan ampon bayung bie. Banuang catuki iniang mItuburan ya king noviciado Loreto carin Darjeeling ning India. Carin ne pinili ing lagiung Teresa layun migsadia para king bie pamaniuyu. Miatas ya king metung a matas a pipamantasan para caring babai king Calcutta, nung nu ya tinurung casalesayan ampon geografia caring anac ding mabandi. Dapot e no apangilagan dinh catutuan a pacapadurut kea — ing calucan, pamagcacasakit, ampon micacaracal a taung pacacalulu.

Banuang Labing Siam a libu't Apat a pulu't Anam, cabang sasake yang tren painturung Daejeeling ban tumagun pamigunam, dimdam neng Hermana Teresa ing cacaibat nang pelino anting "aus busal ning cayausan. Malino ya ing mensaje. Sucat cung maco king convento ban cu lang saupan ding pacacalulu cabang mabibie cu busal ra." Mecaramdam ya namang cayausan ban isucu ya ing keang bue cambe ring Micacapatad ning Loreto at calibe na, ing "talukian ya i Cristo caring langsangan ban yang suyuan busal ding pacacalulu pa caring pacacalulu."

Caibat neng tinggap ing capaintulutang lacuan ya inh Loreto, menalacad yang bayung religiosong comunidad, saca ne impisan ing bayu nang obra, megaral yang cursong pamaningat i Hermana Teresa caring mapilang bulan. Mibalic ya Calcutta, nung nu ya mibie-bie caring langsangan at menalacad pipamantasan para caring pacacalulung anac. Pacagani king maputing sari ampon sandalias — ing caraniuan dang malan ding babaing Indiana — keta aumpisan nong kilalanan ding keang capara — lacuas na ring pacacalulu ampon salunan — ampon pamanaruc king carelang pamangailangan capamilatan ding pamandalo.

Mapagal yang megobra, dapot e ya magdili-dili kecaban na niti. Dacal misimburing sumaup king keang obra, mapilan careta sadia nong ayanad, at canita ya nang meging cabubusalan ding Mituburan ning Lugud. Sinaup la ring aliua king pamamie pamangan, imalan, cassangcapan ampon pamangamit caring edificio. Banuang Labing Siam a libu't Limang pulu't Adua iniang dininan ne ning ciudad i Madre Teresang metung a sadiang albergue, a meging bale para caring magjingalu ampon pacacalulu. King pangalabung nong orden, miyampang la naman ding casuyuan caring meulila, mipaimburisang anac, palpisasang alac, macatua, ampon caring pacatucnang lansangan.

Caring tinuking apat a decada, megobra yang susumangid king pagal i Madre Teresa para caring pacacalulu. Ala yang terucang sepu ing keang lugud, pati na ing keang sicanan, cabang libutanan ne ing labuad ban maniauad saup ampon managcat caring aliua ban tangal king lupa nang Jesus caring maluca pa caring maluca. Banuang Labing Siam a libu't Pitung pulu't Siam, mipagcaluban yang Galal ning Matenacang Paum. Calima ya ing bulan ning Septiembre, banuang Labing Siam a libu't Siam a pulu't Pitu, inaus meng peulian ning Apung Guinu. Pisiag ne anting Banal Papa Francisco i Beata Teresa canitang Capat ya ung Septiembre, banuang Aduang pulung libu't Labing Anam

PANALANGIN PARA KING MASICANAN NANG PAMAMILATAN SANTA TERESA NING CALCUTTA

Nuan a Santa Teresa ning Calcutta, pebalausnan meng mabie milablab keca ing maung lugud nang Jesus a mipacu king Cruz, layun cang miliaring sulu ning keang lugud caring sabla. Ipayabut me kecami ibat king Cabanal-banalan nang Pusung Jesus ing (iyapse ya ing capagnasan). Turuanan mu cung magpabustang ganap pasalangi ampon ipanibala cang Jesus ing mabilug cung pangatau ban ing cacung bie mu naman, magningning ya king keang sala ampon lugud caring aliua. Yasana.

Santa Teresa ning Calcutta,

Patulunan ding Maluca caring Maluca,

— Ipanalangin mu cami!