San Pio de Pietrelcina

23 SEPTIEMBRE 2021 | PADRE PIO: CARAKE KING PAMAILASA NANG CRISTO, PANTAS AT PALPIMALANG SANTO

ING BIE NANG KERALANDALANAN

SAN PADRE PIO NING PIETRELCINA

DAKE I: ING CAYANACAN NA'T PAMAGFRAYLE

Metung yang Italianong pari i San Pio a mekilala pauli ning keang capalsintan ampon calingapan, lacuas na pauli ning calam nang sugat a e man pamalinauan.

Mibait ya i San Padre Pio (Francesco Forgione) iniang Cadua yang pulu't Lima ing Bulan ning Mayo, banuang Labing Ualung libu't Ualung púlu't Pitu, carin king Pietrelcina ning Italia. Ortelano la ring keang pengari. Atin yang macatuang capatad a lalaki ampon atlung bungsung capatad a babai, ampon adua pang capatad a maranung meangu bie iniang anac la pamu. Anting anac, bina yang maca-dios at iniang lima ya pamung banua catua pinili nang itagulaling ne ing keang bie king Dios.

King cayapan damla, maca-dios la naman ding keang pengari at intabayanan de ing keang paniulung anting Catolico. Sisimba ya aldo-aldo ing carelang familia at sinuyu ya anting talasuyu ning altar i Francisco king carelang parroquia. Mekilala ya i Francisco king pamaniaclung pamakisut iniasa't kimuanan ne misan ning keang indu king pamanudtud king lapag a batu.

Antabayanan d'ya mu naman i Francisco king carelang barrio, nung nu rng Cafiestan ding Banal bantug la''t parating mipapagmasusian king keang balen. 

King keang cayanacan, atin yang macapagmulalang ararapat: apapakisabuan no ring angel a talaingat, apakisabian ne i Jesus cambe ning Virgen Maria. E ya meturu kea iti, nune asna camistula iti a pepaisip keang arapat da naman iti ring aliua.

Bista man asne pangamaca-dios ing keang familia, bina la namang maluca, a pepailangan keang magobra. Gigulan no ring dacal a banua anting anac king pamamastul malating cauan ding tupa a bandi ning keang familia. King carocan a damla, ing obra yang pepayambal king sundu-sundu na sanang pamagaral, inia e mecatagal caring caedad na.

King keang cayanacan maralas yang misasalunan. Misalunan ya king atian iniang anam ya pamung banua, at iniang apulu yang banua misalunan yang binang maroc a lagnat.

Banuang Labing Ualung libu't Siam a pulu't Pitu, caibat nang megaral atlung banua, sibianan nonf Francisco ring keang pengari king bisa yang maging frayle. Miglacbe la ring keang pengari king metung a malapit a comunidad ding monje at kitang da nung maliari yang makiagum carela i Francisco. Misalugsugan ya't Mesuri, at king keang cayanacan, sibianan reng mangailangan ya pang magaral bayu ya makiagum.

Ban reng asadia ring keang pengari i Francisco, neyunan ding keang pengari ing markilang turu kea. Ban ra ne mang abayaranan ing talaturu, pinili ning ibpa nang Francisco ing maglacbe America ban manintunan, at paralang pera carela. Iniang labi neng limang banua, pacasadia n'ya mu rin i Francisco ban lungub anting novato cagum ding frayleng Capuchino carin Morcone. Pinili ne ing lagiung "Pio" king icarangal nang Papa Pio I, a maki-relicang maralas mayayakit king carelang visitas.

DAKE II: ING PANGAPARI NA'T PAMAGMALA

Iniang labi yang pitung banua, maroc ya pangasalun i Hermano Pio at ing agiu namung acalaman atian ya ing gatas ampon keso. Mitubud ya kinh cabunducan ban mipayanginan ya carin, at iniang e ya ginana iti, peulian de king keanh familia. Sumangid na niti ngan, sindu na ing pamagaral king pamag pari.

King metung a pamicatagun cabang manalangin, mangasdan nang tengalan ampon pepabalu ning capara nang monje ing pangayatna na king metung a penandit ning e mu nanung casngauan.

Meordinan ya anting pari i Hermano Pio canitang banuang Labing Siam a libu't Apulu, dapot mipaintulutan yang manatili bale pauli ning maina nang pamicacatauan.

Banuang Labing Siam a libu't Labing Lima, cambe ning papasakit a Mumunang Labanan ning Labuad, mituburan ya i San Padre Pio ban sumuyu king militaria. Miaduanan yang maco king malating comunidad ding monje nung nu ya canita mamale, at etasan de king pamaniuyu king pamanulu. Dapot, pauli ning maina ya pamicacatauan maralas yang mipapaulian, at caibat nang kinayap mipabalican yang sumuyu. Bulan ning Marso ning banuang Labing Siam a libu't Labing Anam, pepaulian da ne tagana pauli ning maina nang pamicacatauan.

Cadua yang pulu ing Septiembre, iniang daramdam yang cumpisal i San Padre Pio, mecaramdam yang masakit caring gamat na't bitis angga king apansinan nang ing sugat, ding sugat nang Cristo, pepalto la caring keang gamat ampon bitis. Masakit ya damdam at pane yang daya-daya. Mamau lang rosas ding sugat, at bista man sindu rang menangis, e la man mengayaua. Ding talaulung sinalugsug king sugat mengasdan la king ganap nang tabas a bilug ning sugat.

Banuang Labing Siam a libu't Labing Siam, migmulang linaganap ing balita dikil king sugat nang San Padre Pio at delauan de rinh dacal a dayu ban deng lauan.

Mebantug ya i San Padre Pio caring taung keang acacatabnu at migmula lang misuglung kea ring e man aisplicang capaliarian. Antimo canitang mesabing miyayatna ya babo ning gabun at macapagmala ya.

Ing keang pangabantug meacua ya pansin king Capulungan at ing Vaticano pigmulan neng sinsala caring keang cararaptan ban lang aparitacan ding tatangal kea. Ya mismu e matula king malagua nang pangabantug ampon caring pandin a keang tinggap pauli ning keang sugat. Ing pamaniuri na kea ning Capulungan ya na mismung pepatutu king e ya iti pamanlaram.

 Banuang Labing Siam a libu't Atlung pulu't Atlu iniang migmula yang mealili capaniansalan ing Vaticano cang San Padre Pio at pasibayu yang mipaintulutan caring keang cararaptan. Macapanaral ya, bista man e ne pepabalan ning Capulungan a daptan iti, cabang igiagan no ring taung dalauan Papa Pio XI ing dalauan de.

DAKE III: ING PANGAYANGU NA BIE'T PANGASANTO

Banuang Labing Siam a libu't Apat a pulu't Pitu, delauan neng Padre Karol Wojtyla i San Padre Pio at sinabi na keang miyatna ya king pecamatas a casuyuan kinh Capulungan. I Padre Karol Wojtyla ya nang meging Papa Juan Pablo II canitang banuang Labing Siam a libu't Pitung pulu't Ualu.

Ginamit neng San Padre Pio ing malagua nang pangabantug ban muclat pipanuluan carin Dan Giovanni ninh Rotondo. Mibuclat ya ing pipanuluan a ita canitang banuang Labing Siam a libu't Limang pulu't Anam.

Sigsugan nong Papa Pablo VI ding capaliarian canita a pacapadurut cang San Padre Pio layun pipusan na ing sanu pa mang pamanialangsang king keang pamanialugsug ampon king catutuan ding sugat nang San Padre Pio.

Mekilala ya king mabilug a yatu i San Padre Pio. Mekilala ya kinh keang capalsintan, calingapan, ampon king gelingan nang manaral. Mekilala ya canita ing usuc nang: "Manalangin, manaya ca mu't e migaganaca."

Misalunan ya mu namang aliuang sakit, antimo ing cancer a mamalang meulu kilub da ring aduang pamanulu. Ding aliua pa, antimo ing arthritis, ila nang sinalut kea kecaban ning keang bie at e na meulu pa.

Sinalangi ne king cayarian ning banua i San Padre Pio canitang Cadua nang pulu't Atlu ning Septiembre, banuang Labing Siam a libu't Anam a pulu't Ualu. Dacal lang tinagun king keang lame ampon pangacutcut a mabibilang migit Calauit catau.

Pepabal neng Santo Papa Juan Pablo II canitang Calabi nang Anam ning Junio, banuang Aduang pulung libu't Adua. Ya ing Patulunan ding talapanlualung memalen, ding tutua ucul, ampon ing barrio ninh Pietrelcina.

PANALANGIN CANG SAN PADRE PIO

O San Pio, ituru mu caming manalangin cambe ning cabsban lub ban keng mibilang caring mapacumbabang pengacuanan na ning Ibpa king mayap a balitang bulalagan na caring misterios ning keang cayarian.

O San Pio, ituru mu caming manalangin cambe ning Casalpantayanang sumaup kecaming kilala king lupa nang Jesus caring pacacalulu ampon magcacasakit. Antabayanan mi cami caring penandit ning caligaligan ampon casasagculan, at nung misubsub ke man, bustan mu keng pilasan ya ing sacramento ning capatauaran.

O San Pio, ituru mu caming malambis a devocion king Virgen Maria, ing Indu ning Guinu tamung JesuCristo ampon Indu ta mu naman. Ipangara mi ya keca ing cayaduanan ning pamanampang caring kekeng caladua king Virgen a Malam ban ming apakiabutan ing alang anggang caligtasan ibat king Guinu.

O San Pio, metung ca kecaming cacaluguran, talapanaplac ding kekeng caladua, ampon talasaup ming palpicasala. Asna cang capagmasabal kecami, pablasang balu mu nung macananung magcacadakit. Ipangara mi ya keca ing mayap ming pangatau ampon ding caring kekeng pacamalan.  

O San Pio, ipanibala mi la keca ring kekeng espiritu ban mi lang apibatan ding casakitan a pupusanan da ring kecaming pilubluban.

San Pio, antabayanan mu cami king pamaglacbe mi keti sulip painturu king nuan a carinan, nung nu ke mu naman manayang miras ban magmulalang alang capupusan king ligaya ning Ibpa, ampon ning Anac, ampon ning Banal a Espiritu.

O maligayang San Pio, keca ming ipangara ing aclis ning pamamilatan ban lang apakiabutan ibat king Divinong Cayapan ding graciang malablab ming pagnasan. Tanggapan mu ke king kecang caingatan, ipaglualu mu cami ibat caring sablang maroc, at migit caring sabla, ipamilatan mu cami arapan ning Cacatas-catasan, I JesuCristo, ban capamilatan ning capatauaran ding casalanab macapanatilu ke king pamaniapat mayap.

O Dios, binie mu cang San Pio ing maragul a dangalan ning pamakirake king macabucud a caparalanan king pamailasa na’t camatayan ning kecang Anac. Ipagcalam mu kecami, capamilatan ning keang pamamilatan ing gracia ning…

(Tunggen ta lang matajimic ring kecatamung capagnasan)

… a bina ming pagnasan; at migit caring sabla, ipagcalam me kecami inh graciang munie pacatuki king camatayan nang Jesus, ban keng macapiras king ligaya ning keang pangasubling mebie.

Iti yang aduan mi king capamilatan ning Guinu ming JesuCristong Anac mu, a mabibie ampon mag-ari cambe mu, king cametungan ning Banal a Espiritu, Dios, mangga man king alang angga.

AMEN.

(Ban ta lang munang apasalamatan layun anabangnan ding aniuaran tamung gracia king pamamilatan nang San Padre Pio, mangadi tamung metung a Ibpa Mi ampon Bapu Maria, cambe ning Ligaya king Ibpa).

San Padre Pio ning Pietrelcina,

Patulunan ding Talapanlualu ring Memalen:

IPANALANGIN MU CAMI!