San Jerónimo de Estridón

 29 SEPTIEMBRE 2021 | SAN JERONIMONG MING PACAMALAN, ALAGAD NACA NING BANAL A CASULATAN: ULIRAN CA KING BIE CABABAN

Dacal caring banal ing migaganacan caring e pasabing cayapan o catapatan a carelang papakit, dapot i San Jeronimo maralas yang migaganacan king cacuyaran na capibabatan! Tune ing dimut ya mu pamibabata at macapagbugnus yang sora king pamaniulat, dapot ing  migit ya pang e palac keti ing lugud na king Dios ampon king Anac nang i Jesus; ing ninu mang tinuru king kealan ustu casalang ne ning Dios ampon ning catutuan, i San Jeronimo naman telukian ne cambe ning masicanan na't mapanuligsang pamaniulat.

Migit yang e palac caring sablang matenacan caring Casulatan, king pamanlicas mang mapilan king Lumang Tipan ibat king Hebreo. Sinulat ya namang causucan i San Jeronimo a tuneng maragul a ibatan ning tagimpang espiritual para kecatamu mangga man ngeni. Mabeluan yang magaral, masigasig a matenacan, e pasabing susulat ampon mumusuc caring monje, obispo, ampon king papa. Sinulat ya pa pin dikil kea i San Agustin, "Ing pabustan nang [San] Jeronimo, e ne man ataruc-taruc ning metung a tau."

Maulaga yang pacasubali i San Jeronimo king pamanlicas ma king Biblia a meaus Vulgata. Aliua man iti ing pecaganap nabg edicion ning Biblia, dapot micayapan yang damla king pangatanggap na king Capulungan. Ngana pin ning metung a matenacan ngening casalungsungan, "Ala pang metung mang yau bayu i [San] Jeronimo o caring keang casabayan ampon mapilang tau caring dacal a siglo pangaibat ing carampatang pagobran ya iti."  Ing Consejo ning Trent minie lang pansin king bayu ampon meustung edicion ninb Vulgata, saca ye pepabal a ganap a textong gamitan ning Capulungan.

Ban macapaliari neng pagobran iti, sidia neng miamasamas ing keang sarili. Matenacan ya king Latin, Griego, Hebreo ampon Caldaico. Megumpisa yang megaral king keang tibuan, caein Stridon ning Dalmatia. Caibat ning paunang pamagaral, pepainturu ya Roma, ing cabubusalan ning pamipamanyas carng panaung ita, at ibat carin, king Trier ning Alemania nung nu ya meakit king catenacan. Meratun yang mapilang banua caring balang lugal, parati nang sibucan ing pantunan ya ing pecabiasang talaturu. Icua na pang mecasuyu anting privado nang secretario ning Papa Damaso.

Caibat ding capagsadian nang pamagaral, mecapaglacbe ya pa king Palestina, babacas caring balang daclat ning bie nang Cristo cambe ning maniampucaking capalsintan. King asne caula, meratun ya pang limang bajua king ilang ding Calcis ban neng asucu ing keang sarili king pamanalangin, pamag-ayunu, ampon king pamagaral. Catataulian, migdatum ya Betlehem, nung nu ya menucnangan king cueva a paniualang pisapuacan nang Cristo. 

Meangu ya bie i San Jeronimo carin Bethlehem, cabang manatili yang pacacutcut ing keang catauan king Basilica nang Santa Maria Mayor carin Roma. Yang Patulunan ding Talalicas, Matenacan king Casulatan, Manibala caring Lugal Pipamasan, ampon ding Magaral. Mipapagmasusian ne man ing keang cafiestan balang Catlu nang pulu ning Septiembre banua-banua.

ING PANALANGIN NING CAPANIAUARAN PACALULU KING DIOS A KIDTA NING MALIGAYANG SAN JERONIMO

Ipakit me cacu, O Guinu, ing kecang pacalúlu, layun meng pamatulan ing cacung pusu caniti. Bustan mu cung manintun keca a caluat cu nang pagnasang akit. Nio, lauan me iting taung simsam, pinyintang, ampon mabnu ra nang apate ring mapanaco carin king dalan painturu Jericó. O Maganacamg Samartano, ume ca keni't saupan mu cu! Acu ing tupang melili king ilang. Panintunan mu cu't iyuli king kecang carinan. Papaliarian mu cacu ing pacayagpang king kecang caburian, ban cung macapandatila busal mu kecaban ning cacung bie, layun purian ca cagum ring sablang casaut mu ligaya bamua king alang capupusan. Yanasa.

SAN JERÓNIMO,

Patulunan ding Talalicas:

ANTABAYANAN MU CAMI!