Nuestra Señora del Carmen de San Sebastian

ALDÓ VIÉRNES: CA-16 NING JÚLIO 2021

Ing Cafiéstan ning Maligáyang Maki-Dambánâng Pambansâ carin Ciudad Quézon, ing Indûng Virgen Maria carin king Cabundúcan ning Carmélo.

Banuang Labing Ánam a líbu Labing Ualu iniang binié ré ding Descálzong Mádreng Carmelíta ning Ciudad ning Mexico king catlûng dáke ring Misionérong Agustínong Recollétos ing laráuan ning Indû carin Bunduc Carmélo.

Ding Recollétong Misionéros, a pámuntucán nang Pd. Rodrígo de San Miguel, ing Vicário ning Lalauígan ning pámaglacbe ding misionéros, icuá reng átuclûánan ing gabun ning labuad Filipínas canítang banuang Labing Ánam a líbu Labing Ualu canitang búlan ning Máyo, pákilála caring túbû ing devoción king Indû carin Bunduc Carmélo, exáctong Ápat dálang banuá na ing mílábas.

Múmúná yang mídambánâ ing laráuan king convénto ding Recollétos king San Juan de Bágumbáyan.

Banuang Labing Ánam a líbu Aduâng púlu't Métung iniang ing laráuán ning Indû carin Bunduc Carmélo mípuc ya king Pisambán nang San Sebastian, a ngéning Minor Basílicá nang San Sebastian king Quiápo, Ménílâ.

Banuang Labing Ánam a líbu Limang púlu iniang peintúlután ne ning Carmelíta ning Lalauígan carin Andalucia, España ing Recollétong Priór ning San Sebastian ban mamendición ampon palagánap king pámaniúlud caring escapulários uling búcud yá mung dambána, santuário, ampon bucud díling talaíngat ning banal a laráuan.

Télacad néng Msgr. Juan Vélez ning Catedrál carin Ménílâ ing Cofrádia del Cármen canítang mamalá neng ásalba ibat king maróc a salun caibat nang ménalángin king banal a laráuan. Páintulután ne ning Carmelítang General Priór ing Cofrádia canítang banuang Labing Ánam a líbu Siam a púlu't Métung at iblasanán nóng ganap a capanibalân ding Recollétos king matíbe pángatalacad ning cofrádia.

Banuang Labing Pitung líbu Labing Siam iniang king lele ning siglo catuang Basílica nang San Sebastian mítalacad ya ing métung a Beatériong lubus mítagulaling king casuyûan king Indû carin Buduc Carmélo. King capanaunang ita, mísapuac ne ing Capulúngan ding Hermánang Agustínong Recollétos.

Banuang Labing Ualung líbu Siam a púlu iniang ing San Sebastian mitas ya bílî anting Basílica Minor. 

Banuang Labing Siam a líbu Ualung púlu't Atlû iniang pigmulán néng Rd. Nicolás Salvatiérra ing metung a alâng anggang novéna king Indû carin Bunduc Carmélo at mipapangadîan ya bálang Sábado.

Banuang Labing Siam a líbu Siam a púlu't Métung iniang mícoronan yang canónicá lálam nang capanibalân San Juan Páblo Caduâ, king pámangilála king malambat da nang pámagdevoción ding Filipíno, páparangal kéa anting túne Reiná ning Banua.

Pémuntucán néng Jaime Cardinál Sin, Arzobíspo ning Ménílâ, ing pángacorónang canónicá.

Pacapatagulaling la king keang pamamilatan ding:

●Orden ning Agustinu Recoletos ning Basilica Minore de San Sebastian king Ciudad ning Menila.

●Orden ning Carmelitana ning Monasterio de la Carmelita, Lakanbalen ning Angeles

●Parroquia ning Nuestra Señora Del Carmen quing 

Barasoain Church, Ciudad ning Malolos, Bulacan

●Parroquia ning Virgen del Carmen king Sitio Duat, Barrio Pulungmasle, Balen ning Guagua

●Barrio Sindalan,Ciudad ning San Fernando 

●Barrio Valdez, Balen ning Floridablanca 

●Sitio Alauli, Barrio San Vicente, Balen ning Apalit

at ding sablang parroquia at visitas king balang balen, barrio at sitio a macalalam king cayang cayampunan at panalangin.

PANALÁNGIN KING INDÛ CARIN BUNDUC CARMÉLO

Ó Virgén ning Camélo, Casantú-santúsang María, pengàcú mung cambilan mó ring sumúlud king banal mung escapulárió, ipagluálú la caring sablâng cáligalígan ning labuad ampon caring ligálig ning demónio, pápákit caníting catutûan cambé ring é pábílang ampon magdili-díling malâ. Ipánigapú cu kéca, Ó kécaming Indû, íca sánang maliári cung masícanang talapanluálú caniting mistúlá cung bie ban caníta caring cadaluman ampon cáligalígan macápanátag cu lub, ampon king tucsú mayákit cung matagumpé, capilan man mánálig king kécang casaupan ban ánabangnan la ring tauling cálam.

Ó Virgén ning Carmélo, Indû ning Dios ampon macabúcud rang pátulûnan ding maniúlud king banal mung escapulário, antí na ning peligayán naca ning Divínong Camálan capamilatán ning pámamílí kéca anting saríli nang indu, pagparalampú cu kéca ing papanatilian mu ing pacalúlu ning pacamálan mung Anac caring cácung casalánan, paniúlung king cácung bie, casaupan caring cácung pámangailángan, pangayaplac caring cácung casákítan ampon ing macabúcud a gráciang áduan cu caníting novéna nung macáyablas ya iti king lacuas nang icarangal ampon icaligáya ning Dios ampon king lacuas nang icacáyap ning cácung caladuâ. Yanásâ.

CAGALÁYAN KING INDÛ CARIN BUNDUC CARMELO

Sampága ning Carmélong Cabundúcan,

A tútúbû't lálábung king mulájan.

Camálan ning banuang cacatas-catásan.

Sulûng saslag king caralumdûman.

Indû't Virgén, Indûng cayumú-yumuan.

Bucud díli sampat caring lélangan.

Virgén king dúngis é cayákitan.

King Anac ning Carmélong calunus-lunúsan,

Ibié mu't ipagcálam ing canuánan.

King dáyatmálat ning bié ming daralánan,

Ica ing batuing tátáid kécami ngan.

Indú carin Bunduc Carmélo,

– Ipanalángin mu cami.

San Simon Stock,

– Ipanalángin mu cami.

Ícayung sablâng Banal a Carmelítas,

– Ipanalángin yu cami.