Ing Caselesayan ning Devocion King Indu Carin Bunduc Carmelo

ING CASALÉSÁYAN NING ORDEN DING CARMELÍTAS, ING DEVOCIÓN KING INDÛ CARIN BUNDUC CARMÉLO, ING BANAL A ESCAPULÁRIO

Métung yang cárinang mésambitlá king Banal a Casulátan ing Bunduc Carmélo nung nú ya ménucnángan i Proféta Élias, Pácabangun king cátas nang Líbu Pitung dálan Ápat a púlu't Aduâng tálampácan bábo ning bílî ning dáyatmálat ampon bábo ring batiáuan ning Daúngang Pílatan ning Mediterániá king Israél. Ketí ya ménalángin king Dios i Élias pára king caligtásan ning Israél, a magcácasákit paúlî ning maróc a bílîng cáléldo caring capanaunan a réta. 

Mísundú yang ménalángin at tinúbud nó ring kéang talasúyûng mukiat king bunduc caring mápilang ucdû ban lumáue nung muran. King capitung púlung ucdûng súbuc, míbálic ya ing talasúyû nang Élias cambé ning máyap a balitâ. "Lauan yé ing métung a malating bígâng miangat pasáca king dáyatmálat anting bitis ning táu" (01 Árî 01:44). Cácaibat na pá níta, ing micacásicang uran dínugpa ya king tigang a gabun at míligtas ya ing balen ning Israél. 

Íkit neng Élias ing bígâ anting tandá ning Virgén a mésambitlâ caring profecíyas nang Isáias (Isáias 07:15). Ding ermitániong pácasáut cábitisán ning Bunduc Carmélo a tínukí king alimbáuá nang Élias ampon ménalángin pára king paniatang ning lubus pánenáyang Virgén, a maliári anting indû ning Mesíyas. Ing camumulán na't íbatan ning Ordén ding Carmelítas mécad mipagtantûan la pabálic cang Élias ampon caring kéang dicípulos.

Canítang Calabing Atlûng Síglo, casalung-súngan ding Cruzádas, mékiágum ya i San Simon Stock king capulúngan ding ermitánios king Bunduc Carmélo casalung-súngan a pámaglacbe paintúru king Banal a Cárinan. Canítang banuang Labing Aduâng líbu Ápat a púlu't Pitu, méalal ya anting Cánam rang Generál-Superiór ding Carmelítas king múmúnang capítulo a mipaintágun king Aylesford, Inglatéra. 

Dápot, miyayambanganan ya ing orden king paniúlung king cabilúgang pámananggap ampon magcácasákit king binâng pámanalípit ampon pámanalipusta ibat caring clérong mistúlâ ampon caring alíuang orden a pépalagánap caring mongje a magtaguláling king Nuan a Virgén canítang banuang Labing Aduâng líbu Limang púlu't Métung. 

Aldó Domíngo: Calabí nang Ánam ning Júlio banuang Labing Aduâng líbu Limang púlu't Métung, cábâng pácasiclaud yang mánalángin i San Simon Stock, pepákit ya kéa ing Indû, kikilícan ing Anac a Jesus king métung a tacde't tatalnan ing Macomanggîng Escapulário king sumángid. Igcas nó mismu ring macatuking cataya: “Hoc erit tibi et cunctis Carmelitis privilegium , in hoc habitu moriens salvabitur” Ngana uari: "Ití ya ing maging dangálan pára kéca ampon caring sablâng Carmelítas, ban ing nínú mang jíjingalung súsúlud caníting abíto miligtas ya".

Canítang Calabí nang Atlû ning Enéro banuang Labing Aduâng líbu Limang púlu't Métung, mécátanggap yang súlat ning pámagluálu ing orden ibat king Pápa Innocéncio Capat, cácambil caréla ibat king pángapasákit.

Minie yang banal i San Simon Stock kecában ding Dinálan a banua at meté ya king métung a Monestério ding Carmelítas carin Bordeaux, Fráncia canítang Calabi nang Ánam ning Máyo banuang Labing Aduâng líbu Ánam a púlu't Lima.

Ing Escapulário ning Indû carin Bunduc Carmélo, a mayayáus mú naman anting ing Macomanggîng Escapulário, métung ya caring pécabantug ampon mipapagmasusian caring devociónes ning Casalpantayánang Románo Católico. Ing Sacramentál (anting caraníuang gagamítan ding mistúlâng talasalpantáyâ) métung yang léting versión ning mismung macomanggîng escapuláriong gagamítan ding carmelítas - ing alâng manggas a gáning panlual a mibabalag ibat caring pagó a misusúlud anting tandâ ning carélang keáus ampon devoción.

Binié né ning Indû ing métung a escapulário cang San Simon cambé ring igcas nang macatukîng catáyâ, "Tanggapan mé, pácamálan cung anac, ing abíto ning kécang orden: ití ya ing kécang dangálan ampon ding sablâng Carmelítas, ban ing nínú mang maténg súsúlud caníti é ya lumása king alâng anggang apî ... Magí neng tandâ ning caligtásan, pángacambil ibat king cáligalígan, ampon métung a pangácú ning capayapan."

Pácacabit king pámaniúlud king Macomanggîng Escapulário ya ing Dangálan ning Aldó Sábbath. Ing lagiûng, Dangálan ning Aldó Sábbath, méníbatan ya king búlang afocripá nang Juan Caduâng púlu't Aduâ a mípamalagiûánang "Sacratissimo uti culmine", Catlû ning Márso, banuang Labing Atlûng líbu Aduâng púlu't Aduâ.

Agpang cang Pápa Juan Caduâng púlu't Métung, binié né ning Nuan a Virgén ing macatukîng mensáje king métung a pámipatílip dikil caring súsúlud king Macomanggîng Escapulário: "Ácu, ing Indû ning Grácia, típá cu king aldó Sábado (Sabbath) caibat ning carélang camatáyan at ing nínú mang ákit cu king Purgatório, itimáuá ke, ban caníta átairan có paintúrû king banal nang bunduc ning bié alâng angga."

Agpang king Tradición ning Banal a Capulúngan, atlû lang condiciónes ding súcat iganap ban yang lubus ápakiabútang nabangnan iting Dangálan ampon ing Escapulário: 

01. Isúlud ya ing Macomanggîng Escapulário

02. Manatíling tapat agpang king saríling cábilîan king bié

03. Pangadîan ya ing Banal a Rosário

Ban átanggap ya ing canuánang éspiritual a mipapayábut king Escapulário, súcat ing solémneng tanggap king Macomanggîng Escapulário capamílatan na man ning párî o ning métung a láyco a mítalaga caníting catungcúlan. Pángatanggap, alâ nang alíuâng Escapulário ing cailángang mabéndicion báyu maniúlud. Ing canuánan ampon pámipasúlud míablas nó king súsúlud kécábân ning keáng bié.

Mipapagmasusîan ya ing Cafiéstan ning Indû ning Bunduc Carmélo neng Calabí nang Ánam ning Julio, ing capárang aldo nung capilan ya pépatílip ing Indû cang San Simon Stock.