Ing Bie nang Keralanan Santa Rita ning Cascia

ING BIE NANG KERALANAN SANTA RITA NING CASCIA

I Santa Rita, a patulunan ding sablang bageng e sucat mapaliari, minie yang bie dacal a balakid. Dapot, kecaban ning bie nang ita kimtan na ing dacal a macabaldugang tagumpe. Kilala ya naman anting ‘Talapamaum nang Jesus’ uli ding mangayap nang dapat. Bugtung reng anac di Antonio ampon Amata Lotti king malating barrio malapit king Cascia, Italia. Ding mala nang Santa Rita migmula la canitang mebiniag ya iniang ding biung-biungan memutacti la padurut ning keang cuna. Malambis lang sinulagpo palub ampon palual ning keang asbuc at padurut kea cabamg e re panasakitan o guguluan ing ninu pa man king keang familia.

King calabi nang aduang tua birian nang lungub king convento dapot penamdaman ding keang pengari king lacuas yang maingat nung pacasal ya. Pesari lang casal para kea cang Paolo Mancini, ing talapamatio ning balen. Mipanuanan yang cambal a anac a lalaki ing carelang casal. King e cayapan, matbud ya I Paolo, malagua yang mimimua at linasa ya I Rita king keang pamanalipit busal ding labing ualung banua bayu ya milusuban ampon misacsacang mate. Ding magbabaintau rang anac pigdulapan dang makapanablas laban king pangamate ning carelang ibpa. Capamilatan ding keang panalangin ampon pamamilatan e la kinimut ding anac na king tangca rang pamanablas. Dapot para lang mete king sakit kilub ning banuang ita.

Milacuang magdili-dili,  pigdulapan nang Santa Rita ning Cascia ing bie religiosa dapot ding Agustinong madre ning monesterio nang Santa Maria Magdalena pepayalian dang lungub ya king convento. Uli na ning mapilan caring carelang cayabe abe la king familiang micasalang uli na ning pangamate mang Paolo, mitacutan la para ming capayapan ning convento.

Ding mapilang salese nang Santa Rita pisimburi ra king midala ya king convento king cabengian king pamamilatan ding keang patulunan, di San Juan Talapaminiag, San Agustin ning Hippo ampon I San Nicolas ning Tolentino. Iniang ikit de ring madre kilub ding pader ning convento tinggap de cabucasan.

King metung pang salese nang Santa Rita king erapan no ring pepasari king pangamate ning keang asaua at peniganapu nang munie no mu king capayapan. Mesabing, king catataulian, ding aduang misalang a familia memirma la pang casulatang papasiag king mepupus ne ing pamisagsagan da king metung at metung.

I Rita ning Cascia ing mebalung indu a dinalan maragul a fisicong pamanalipit caring gamat ning keang asaua ampon calungcutan king pamisip caring anac nang magdulap pamanablas, megi yang madre king catlung pulu’t anam nang tua.

Minie yang apat apulung banua I Santa Rita anting madre king calucan ampon gagauang dapat ning pacalulu, calingapan ampon paum. Iniang linub ya king convento mirinan yang metung a abito. Sinulud ne itang metung a abitong ita tanda ning keang bie ampon micutcut caniti.

Misan a aldo, cabang pacasiclaud yang manalangin I Santa Rira arapan ning larauan ning Cristong Mipacu king Cruz. Pigparalampu na, “O cacung Jesus, racayan mu cu sana king kecang pamailasa aggiang metung mu caring kecang sucsuc.” Ing metung a sucsuc ibat king coronang macapadurut king buntuc nang Jesus agad yang dinugpa king canuan nang Santa Rita. Dinaya ya iting sugat angga king capupusan ning keang bie.

Ding tauli nang apat a banuang Santa Rita ning Cascia mirate ya king pipagkeran anting lubus a mangailangan king calingapan ding keang  capatad. Mengan yang ditac a lacuas king Eucaristia at tiru no ring anac a magmadre. Caring tauli nang aldo, atin yang metung a cayaduananing magdalang metung a Rosa ibat king pibandian ning keang familia. Pangalibutad canita ning Enero at ding keang pisan talastas dang e sucat mapaliari iti. Dapot iniang ume ya king bale na canitang Rita menakit yang metung a rosang mamucadcad king pidicutan ning mula ning carelang familia.

Acatabnu neng Santa Rita ing Divino nang Talapagligtas canitang Caduang pulu’t Adua ya ing Mayo, banuang Labing Apat a libu Limang pulu’t Pitu. Pisiag ne anting Beatang Papa Urban VIII canitang banuang Labing Anam a libu Aduang pulu’t Pitu at pisiag neng Santang Papa Leo IV canitang Caduang pulu’t Adua ya ing Mayo, banuang Labing Siam a libu.

Uli ring  dacal nang delanang balakid ampon sacrificio kecaban ning keang bie I Santa Rita mekilala yang Patulunan ding E Sucat Mapaliari ampon Masakit a Cabilian. Maralas deng deluman ding magcacasakit ampon mayayalipit, salunan, magcacasakit king cabilian, ding masakit a pangayasaua, mebalu,  misugatan, lacuas na ding magcacasakit king cayalang sicanan ampon pangabaug.

Dacal la pang salese dikil caring dapat nang calingapan ampon capamintuan. Metung caring salese nang Santa Rita iniang ing Madre king Convento, magnasang subucnan ya ing capamintuan nang Rita, itusan neng diligan ing metung a mete ampon malalantang tanaman ibat king mula ning convento aldo-aldo king pabanua. Memintu ya I Hna. Rita king miatas kea, aldo-aldo. Kñing capupusan ning banua, king maragul dang pangasdan ding Superioras, memulung ya ampon memulaclac ing tanamang meteng ita at megi yang lacuas a masampat caring sablang vinong ubas king mula. 

Ngeni, dacal nang banua ing milabas, ing peca-vinong ita menatili yang mabunga ampon masampat. Mipalagian la’t mepulvos ding bulung at miparala la king mabilug a yatu caring magcacasakit. Dacal lang mebalitang panga-ulu uli ding bulung ning ubas. Miparala no man king Papa ampon caring aliuang Mangasiua ding bunga na.

Ing banuang Labing Apat a libu Limang pulu mipasiag yang banua ning jubileo capamilatan nang Papa Nicolas V. Iniang miatasan yang mantabe caring aliuang madre I Santa Rita king Roma ban nabangnan ne ing indulgencia ning banua, sinabi ra kea ding keang Superioras king paintulutan deng ume potang ing sugat king keang canuan maulu ya. Mesabing, iniauad nang Santa Rita cang Jesus ing uluan ne ing sugat king keang canuan ban macapunta ya carin Roma cambe ring keang capatad. Tiningid ne ning Dios ing keang panalangin. Meulu ya ing keang canuan at mipaintulutan yang mantabe caring keang capatad painturu king Roma. Iniang mecauli ya, iniang tuclu ya cabitisan ning visitas carin Cascia linto yang pasibayu ing sugat at menatili ya angga king keang camatayan.

ING JIYAS A PERLAS NING CASCIA:

ING DEVOCIONARIONG PARANGAL CANG SANTA RITA NING CASCIA

Capampangang  Catipunan ding  Panalangin  ampon  Devocion cang  Santa  Rita  ning  Cascia 

Kepampanganan  na't  sidiang: 

CIRILO SOCORRO: SALE NING CAPASNGAUAN 

King  saup  at patnube ning: 

SUÁNDALÍS at ning

DAGÍSPISAMBAN KAPAMPÁNGAN