Aldo Nang Apu Siru

ALDO TAGULALING KING PAMAGDEBUSYUN KING MAL A ORTELANU 

Balang Calabinglimang Aldo Ning Bulan

SAN ISIDRO LABRADOR

Patulunan da ring sablang Ortelanos

TANDA NING CRUZ

King capamilatan ning tanda ✠ ning Banal a Cruz, icabus mu ke, O Guinu ✠ ming Dios caring keoeng casalang. King lagiu ning Ibpa, ampon ning Anac ✠, ampon ning Banal a Espiritu. Amen.

CAPANISIAN

¡O Guinu cung JesuCristo! Cacung Dios ampon tutung tau, Milalang cacu ampon Menatbus, uli na ning ica ing cacung panginuan at bina racang caluguran lacuas caring sanu pa mang bage, maragul a simbayat king mabilug cung pusu ing pamicasala cu keca: taimtim cung ipagcapilit ing e na cu pa micasalang pasibayu, ampon ing icauani ya iny cacung sarili caring pamicasala keca, at ing mangumpisal ampon miganap capaglarinan a miabie cacu, ampon king pamaglarin at gaganap king sucat a bage: 

Daraun ke keca ing mabilug cung bie, pangimut ampon cararaptan king capatauaran ding sabla cung pamicasala; at anti ing pigparalampu cu keca, manalig cu naman king kecang cayapan ampon alang cupas a pacalulu, king patauaran mu cu, para caring meritos ning cacamal-camalan mung Daya, Pamailasa ampon Camatayan, layun ipanabang cacu ing graciang maglarin king cacung sarili ampon misadsad king banal a casuyuan keca angga na king camatayan. Yanasa.

PAMUCLAT A PANALANGIN

O Maligayang San Isidro Labrador, Patulunan ning sablang ortelanos,  uliran king cabanalan ampon cayapan, nung ing daralum cu king Dios a kecatamung Guinu caniting Novena, camapilatan ming masicanan mung pamamilatan, para ya king icarangal mu't icaligaya ampon para king icacayap ning cacung caladua: Ipanigapu cung ipayabut me ibat king Divinu nang Pacalulu, tatabili king cacung sarili, ban canita ing cabanal-banalan nang caburian miganap ya caring sablang bage. Yanasa.

PAMAMASA

Pamamasang ibat king Mayap a Balita agpang cang San Juan 15:01-07

CAYADUANAN

O Mal a San Isidro, king cababan mung macayama arapan ning Dios, ketulan nang pasibul ca busal ning malanging dayat. Ngeni, caring pusu ming kelangian at mengalumbe king lugud ampon lingap:

R. PASIBULAN MU KECAMI ING LUGUD.

O Caluguran ming Patulunan, pakit ca sana caring sablang magobrang masampat a alimbaua, ban angga king carelang obra ban macapangabiayan apakirasan dang ing bie king cabanalan. Inia, ngaming papamilatan keca: R.

O San Isidro, pakit ca sana cambe ning esposa mung i Santa Maria dela Cabeza caring sablang miasaua anting masampat a alimbaua, ban king mayap man o maroc a bili mayakit caring balang metung carela ing keaus da king cabanalan. Inia, ngaming papamilatan keca: R.

O Malugud king Banal a Eucaristia, pakit ca sana caring sablang mabibie king carelang keaus anting masampat a alimbaua, ban aggiang managalan lang oras apakicuanan rang manalangin king Dios at tanggap king Aral na't Sacramentong Cristo. Inia, ngaming papamilatan keca: R.

O Malambis caring sablang melalang, pakit ca sana caring sablang tau keti sulip anting masampat a alimbaua, ban king casngauan man o cagipitan acua rang macasuyu king Dios ampon caring capara rang tau. Inia, ngaming papamilatan keca: R.

O Mayap a Melalang, pakit ca sana caring sablang talapagobra anting masampat a alimbaua, ban ayablas ra ing mayap caring mayap pati na caring casalang ra. Inia, ngaming papamilatan keca: R.

O Mamung San Isidro, pakit ca sana caring sablang meulila ampon kematen anting masampat a alimbaua, ban anggiang king carelang pamagmalun apagcapilitan reng paligayan ing Dios. Inia, ngaming papamilatan keca: R.

* Manatili tamu pu king pinandit a catajimican at sabyan taya pu ing sarili tamung kapagnasan catuki na niti ipangadi ing metung Ibpa mi, metung Bapu Maria, at metung Gloria Patri

PANALANGIN CANG SAN ISIDRO LABRADOR

O Lubus Mayupaya ampon Maligayang Guinu ning Banua ampon Yatu, icang mamuc caring mapacumbaba, babie me carela ing divino mung gracia, at cuculdas mu no man ding palalu king carelang capalaluan: masucu cung ipanigapu keca, king masampat na't macayamang cababan ning tapat mung talasuyung i San Isidro: pagcalaman mu vung mabie beluan king cacung bili, ban king pamaniauad cung mipnung cababan ampon cararaptan, aduan cu ing matibe casalpantayanang apakirasan ing divino mung capagnasan. Yanasa.

ANTIFONA

Nebangan na ing bunga ding keang capagalan, at ing Guinu tamung Dios kipnuan nong mangayap a bage ring danupan.

V. Liguran ne ning Guinu at ketulan 

R. Layun ne pang ginani king camalan.

Aduan mi keca, O Mapamacalulung Dios, king pamamilatan ning nuan mung patutung i San Isidro, ipagcalam mu sana ing kecang gracia ban e mi panamdamang ala keng ulaga, ampon ban sumuyu keca cambe na nitang cababan a kecang cacatulan. Alang-alang king Guinu ming JesuCristo. Yanasa.

PANALANGIN KING NUAN A VIRGEN MARIA

O Macamal a Reina da ring Angeles, Indu ning sablang calinis-linisan: ipanigapu mi kecang ipayabut mu king Pacamalan mung Anac, i JesuCristo, ing pagcalaman na cung maragul a pamicasama king sablang carinatan, para caring kecang meritos ampon ding casugi-sugiang miasauang di San Isidro Labrador ampon Sana Maria de la Cabeza, ban canita mabibie sakdal at malinis, apurian daca, alang patnang magsaya king macamal nang panga-atiu ning kecang ligaya. Yanasa. 

Lalam napu ning kecang cayampunan magsacdal keng magcanlung, 

O casantusantusan a Indu ning Dios! 

E mu sapu pisauli ing aclis mi keca king caguluan mi, nung e bagcus mu keng icabus king sablang pañiganib. 

O maligaya at canuanan a Virgen!

PANALANGIN CANG SANTA MARIA DE LA CABEZA

Santa Maria de la Cabeza, indu ampon asaua, ipanalangin mu cami sana ngening aldo. Capamilatan ning masicanan mung pamamilatan ampon tapat a alimbaua, apakiabutan mi sanang munieng lubus maluca ampon mababang bie. Saupan mu caming e sumauang manalangin ampon makiagum king pamanlingap. Maliari ya sanang panalangin ing mabilug ming bie at saupan mu caming misundu king kekeng pamipabanal caring mistula ming cararaptan aldo-aldo. King pamanuntun king kecang alimbaua, maliari ya sanang tanda ing catapatan mi't capaniadsaran king yatu ing kecaming pamamintacasi king Dios ampon king Banal nang Capulungan. O Maligayang Santa Maria de la Cabeza idalum me sana iting kekeng panalangin cambe nang San Isidro king Cacatas-catasang Dios. Yanasa.

V. Bendicionan naca tamu ngan sana ning Guinu, icabus naca tamu king sablang maroc, at idala naca tamu ngan sana king bie alang angga. R. Amen.

V. Mipuri ya ing Dios caring keang Banal.

R. Mipuri ya't mipaligayan capilan man.