Ing Candila ning Pascua

DING CABALDUGAN DING DAKE NA'T SAGISAG NING CANDILA NING PASCUA

Nanupa'ta, ing mismung candila mangailangan yang sindian aping milalablab ban yang munie sala king keang capaligiran. At iti ya ing pauaga ning mismung SULU, tanda ne king I Cristo ya ing sulung mitatabi king caralumduman. Iting candila ya ing pecamaulagang tanda caniting aldo ampon king kecaban ning masaya nang panaun ning Pangasubling Mebie.

   O sulung masalang dili,

   Nang Cristong Guinu mi't Ari,

   Gloriosong mebie sinubli,

   Dalumdum kecang itabi,

   King pusu ampon ucul mi.

Ing taluctuc ning candila, ya ing API, yang tanda ning maslag ampon maligaya nang pangasubling mebie Cristo. Paganaca nia naman ing sasabian nang San Pablo, "king capamintuan nang Cristo mipuc ya king cacatas-catasan migit king sanu pa man".

   O Aldo ning catalaruan,

   Aslagan mo't pamasalan,

   Mayap at maroc daraptan,

   Isaca mo't calunusan,

   Mamale caralumduman. 

Ing ALPHA, ya ing mumuna nang letra ning Alfabetong Griego, uari na king i Cristo yang camumulan ding sablang melalang. Ganacan tamu king ya ing Divino Verbo, ya ing Amanu ning Dios a gingcas ning Ibpa king pamaglalang king sablang mayayakit ampon e mayayakit.

   O mal a Divino Verbo,

   Linalang king universo,

   Balicdan mo't pacaluluan,

   Layun mo sanang atbusan,

   Ding taung kecang lelangan.

   

"Ibat king tanda ning camarinayan, megi yang tanda ning caligtasan"...Iti ya ing CRUZ, tanda ning upaya nang Cristo babo ning casalanan, babo ning deuacan, babo ning caralumduman. Paganaca ne ing pamagligtas ning Guinu king ketauan ibat king mana tamung casalanan.

   O Macamal a Mandero,

   Kepacuan nang JesuCristo,

   Meging tanda na ning dine,

   Dapot king mabilug orbe,

   Caligtasan kecang binie.

Ing BANUA, paganaca ne ing malambat nang sasabian ding profetas..."Ing Banua ning Guinu"...tanda ne ning catimauan king sablang pamanalipit a singcan ning casalanan. King tagumpe nang Cristo king camatayan a babie pamupus, icua neng abandi ing alang angga, ngana uari ding sablang panaun, ibat king milabasan, ngening casalungsungan, ampon ing daratang a paintungulan.

   O Milanianan a sugi,

   Anac nang David a Ari,

   Ipasiag mu, Guinung Jesus,

   Ing "Anno autem Dominus",

   Caring pag-arian mung lubus.

"Caring keang sugat icua tamung mipaldan"...Iti ya ing pauaga ring BINUTIL A INCIENSO, ing gamat na't bitis a mitaglusang pacung lauit teraman, parang uanan ampon caili, ing catalindikingan nang miulusang tandus, ila ring miglarin kecatamu pabalic king Ibpa. Ing incienso midaraun ya cambe ring panalangin ding tau; ulinita, king mamalaguang salita, ding sugat nang Cristo mengari lang daun para king cabayaran, mengari yang panalangin para king capatauaran, a ketulan nang pekibatan ning Guinu.

   O Cristong Matas a Pari,

   Mibilang ca pangapari,

   Cang Melquizedec a sugi,

   Guinu, ibalic mu cami,

   King Ibpang magdili-dili.

Cabitisan deti ngan, ya ing OMEGA. Iti ya ing tauli nang letra ning Alfabetong Griego. Paganaca na king I Cristo ing capupusan ding sabla. Agpang king libru ning Revelacion, mucum ya ing Guinu caring sabla, munie yang ablas a mangaintulid caring keang lelang..."Casngauan caring mangayap, mangatulid, ampon mengayalipit; Caparusan caring alang masabal, mangaroc ampon menalipan".

   Aring sacdal maligaya

   Milucluc uanan ning Ibpa,

   Mucum ca kecaming sabla,

   King panaung capupusan,

   Catulan mu keng lunusan.   

Ing mismung candila MAPUTI yang bitasa, tanda ne ning calinisan nang Cristo, ing Corderong alang bacas casalanan, a kigli ning Calinis-linisang Virgen Maria. Paganaca na king sucat tayang apusan, munie king calinisan ampon munie sala caring aliua.

   O Corderong alang sala,

   Kigli ning Virgen Maria,

   Layun mi ya pung apusan,

   Laus lub mung capamintuan,

   Ampon bie mung calinisan.

Abril 04, 2021

Binaldug na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king aguman ning 

DagísPisamban Kapampángan