Ding Dare Ra't Cabaldugan Ning Sagigas Para King Calimangdalan A Banua ning Cristianismu Keti Pilipinas

DING DAKE RA'T CABALDUGAN NING SAGISAG PARA KING CALIMANG DALANG BANUA NING CRISTIANISMO

Caniting masusi tamung pamagsaya ning Paniatang ning Casalpantayanang Cristiano limang dalang banua na ing milabas, pepalual yang sagisag ing Capulungan ding Obispong Catolico ning Filipinas (CBCP) para king Jubileong pagmasusian tamu, at ding macatuki ila ring dake ra ampon cabaldugan ning mesambitlang sagisag:

Misalangian yang CRUZ ing sagisag, ngana uari ing tanda ning caligtasan ding Cristianos. Keti ya mayayakit anti ing Cruz a petalacad nang Magellan. Manalacaran ya naman anting matibe asias, anti caring pun ding layag caring barcu.

Cabitisan na niti atin DAUNG, anti mong tanda ding maglayag o maglacbeng migdalang casalpantayanan king gabun tamung tibuan. King malalam pang pamanintindi, pauaga nia naman niti ing Capulungan a mitulad king Arco nang Noe o anting bangca nang San Pedro, king caisipan ning teologia, sacramento ne ning kecatamung pangaligtas.

King Cabuntucan, atiu ya ing SUSULAPONG CULE  MAIRO papakit yang miyayaliuang tanda. Mayakit ya ing Banal a Espiritu king uangis ning pati-pati. Capamilatan ning Banal a Espiritu miliari tamung makirake king Divinung Bie king sacramento ning biniag. Cauangis nia naman ning bigang matas a papauaga king panga-atiu ninh Dios canita caring Israelitas. Miagum lang bagia ning cruz o ing layag king daung, a paganaca kecatamu king capamilatan ning Banal a Espiritu midala la king kecatamung bansa ding missioneros, magdala kecatamung Cristianismo. Ing pangadiking ning Banal a Espiritu painturu ya king dane caili, paganaca na king anting tune Cristianos sucat tayang ganacan ing milabas, cambe ning capasalamatan king pamigaganaca caring yamut ning kecatamung casalpantayanan. Dapot mayakit king iti gagalo ya pablasang ing parang Banal a Espiritu tutulac naca tamu ngening casalungsungan ampon king bucas a paintungulan cambe ning maragul a capanayan king tataid nang panga-atiu ning Dios. Ing padurut nang daclat ning Banal a Espiritu paganaca na king daralakit ya king mabilug a labuad anti mong ing Dios metung yang missionerong Dios a mitutubud king Capulungan para king pangatuburan ning yatu. 

King Libutad, mayakit ya ing metung a DEBUJO, meangu king calalangan nang Fernando Amorsolo a meyaus "Ing mumunang biniag king Filipinas" antimong paganaca kecatamu king pamananggap ding kecatamung pipumpunan king Casalpantayanang Cristiano.

King Cagulutan, mayakit ya ing ALDO FILIPINO metung a catandan ibat caring calalangan nang Fernando Amorsolo. Malinong menibat ya iti king pandi ning Filipinas, anti ing panalacaran ne ing pangayaus jiyas ning aslagang dayatmalat. Migit asabi, king ing aldo pauaga ne ing bayung bie, bayung camumulan, ing Cristong Sinubling Mebie, ing kecatamung capanayan ampon caligtasan.

Pacalaclub king Cruz, mayakit ya ing tandang "ICHTHUS" o ing ASAN a tanda nang Cristo, iti ya ing tandang ginamit da ring minunang Cristianos ban ipauaga o ipakilala lang para lang Cristiano. Paganaca na kecatamu king ing casalpantayanang kecatamung papasiag iya ing mismu ampon caparang casalpantauanang pisiag ding minunnag Cristianos. Cule ya iting Malutu tanda ning daya ding martires a miliaring bini ning casalpantayanan tamung Cristiano king pamakiuangis cang Cristo. Iting "ICHTHUS" tand ne ning pamamalikid king casalesayan anting asias ning casalpantayanan tamung Cristiano.

Pacayagum king ICHTHUS, atiu ing BANAL A ROSARIO anting itamung Pilipino malalam tamung daralo king Canunuanan tamung Indu. Balayan tamung malugud cang Maria, ngana uari: El Pueblo Amante de Maria. 

Nung pacalauan ing cabilugang pangule a megamit meangu la king pandi ning Filipinas pablasang ing Casalpantayanang Cristiano e ya capilan mecaligalig king cultura tamung Pilipino ni king capagmulalan nang yaman, pablasang ding Cristianong virtudes lalacuas la ampon lalagpus king nanu pa mang pamialiua king cultura. Cambe ning pamangilala king macasalesayang paniulung niting balen Filipinas, matas mi yang parangalan ing paniulung na king pangayapus ampon pamanatad da ring minunang Cristianong missioneros a menalacad miyayaliuang aguman ban sanayan lang munie ring Pilipino. Ngeni e tamu bucud mananggap caring dayung missioneros nune antimurin manubud caring missioneros king mabilug a yatu. Sasacup king labuad cambe ning lugud ning Dios anting mumunang diling misiun ning Cabanal-banalang Trinidad a mipagcatiuala king Capulungan.

Cabitisan ra ngan deti, atiu ya ing malambis nang GAMAT NING DIOS Ibpa, caring mangacapal mecule macomanggi, nung nu ing Cabiasnang E Melalang tingca na ing sablang capaliariang mibulalag agpang king keang caburian, babie kecatamung mabilug a larauan nung nanu ya ing sucat tamung pagmasusian ngeni, ing Limang Dalang Banua ning kecatamung Panga-Cristiano. Tune pin, MIPANUANAN TAMU BAN MUNIE CANUANAN.

Abril 04, 2021

Binaldug na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Iting pamipalino sidia ne ning Agumang DagísPisambán Kapampángan.

Pascung Máyap ning Pángasublîng Mebie ning Dispû! 🤞