UME TAMU CANG SAN JOSE...

UME TAMU CANG SAN JOSE...

Bista man ala yang simbitlang amanu i San Jose king casulatan, ing tajimic nang alimbaua ning tapat nang capamintuan ampon ing masicanan nang calingapan king Banal a Familia, kecaban ning bie nang delanan Jesus keti sulip, iti ing mipalliari cayang metung caring macamal a banal ding Cristiano. 

Milabas ing dinalan a banua paganaca neng Papa Juan Pablo II (Cadua) ing pauaga ning Causucan nang Apostolico canitang banuang Labing siam a dalan ualung pulu't siam, ing Redemptoris Custos (ngana uari "Ing Talaingat ning Mengabus"), cambe ning capanaligang "sumulung la ring sabla king pamagdevocion king Patulunan ning Cabilugang Capulungan ampon king lugud king Talapagligtas a siuan na king paralang sucat apusan..."

Ing pamagdevocion king Ibpa nang Talaingat Jesus king cabilugan meakit ya busal ning Catlu o Capat a siglo, dapot agpang king librung pipangadiang Pieta, ating metung a panalangin cang San Jose a keakitang ibat king Calimang pulung banua.

Canitang calimang pulung banua ning kecatamung Guinu ampon Talapanatbus, i JesuCristo, meakit ya iting panalangin a perala na ning papa cang Emperador Carlos iñiang ume ya king labanan. Pablasang ing ninu mung mamasa, macaramdam o misinup caniting panalangin caring carelang sarili, e la malalaguang mate o malumud man kinh danuman, ni e ya macamate carela ing lasun; e la naman ume mipaimburisan caring gamat ding carelang casalang, o masilab king nanu mang api, ni king labanan e la masambut. Pangadian ya busal ning siam a aldo para caring sabla yung aduan. Tutu yang e keakitan iti king cabiguan.

PANALANGIN CANG SAN JOSE

O San Jose, emu nanu ing kecang caingatan, tutu yang masicanan, bina yang marapal arapan ning trono ning Dios, daralung co ngan keca ring caburian cu ampon capagnasan.

O San Jose, antabayanan mu cu king kecang masicanang pamamilatan, at papanatilian mu cacu ibat king Divinu mung Anac ding sablang calam king caladua, capamilatan nang JesuCristong Guinu mi.

Ban canita, king lalam ning masicanan mung upaya keti sulip, apasalamatan ke ampon aparangalan ing lubus malugud a Ibpa.

O San Jose, e cu capilan man micacunu king pamangasdan cu keca, at king pamagpainaua nang Jesus caring kecang gamat; e cu man malliaring lumapit cabang macalapit ya king kecang pusu. Para cacu caulan me sana ampon uman king buntuc na layun aduan mu para canacu ing isubli ne itang uma potang ume nacu king tauli cung inaua.

San Jose, patulunan ding mayayangung caladua,

- Ipanalangin mu cu.

Amen.

Cabang misambitla ya iti king casalpantayanan ampon para king macabucud nang nabangnan ning caladua. 

Ganacan king ing Dios pakibatan no ring kecatamung panalangin. E tamu sana parating magnasang capara ya ing aduan tamung miablas.

Marsu 01, 2021

Binaldug na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king aguman ning DagísPisamban Kapampángan a midake at micalap para king mialiwang istorya at panalangin ning :

© Ding Mal a Patulunan: Ding Tala'mpun At Talaingat

*Sidia ne ning #DagísPisambánKapampángan