Ing Tula Ning Limang Dalan a Banua: Ing Homilia Na Dinaun Nang Papa Francisco Para King Misang Capasalamatan para king 500 Anniversario ning Cristianismo keti Filipinas.

ING TULA NING LIMANG DALAN A BANUA

Cambe ning pamagmasusi tamu king Capat nang Domingo ning Cuaresma, a mayayaus Domingo ning Laetare, ing Keang Cabanalan, Papa Fancisco, makiagum ya ngeni king pamagmasusi tamu king Calimang Dalan a Banua ning Cristianismo keti Filipinas. 

Ing tula niting Domingo, lalaucan ne ing tula ning pamagbayu na ning kecatamung bansa ibat king panga-Pagano painturu king panga-Cristiano, layun magmasusi tamu ngening Jubileo king malugud nang capaintulutan ning Papa.

Nganang Papa Francisco king keang Homilia king Banal a Misang keang dinaun para king capasalamatan tamu king Calimang Dalan nang Banuang Anniversario ning Paniatang ning Casalpantayanang Cristiano keti Filipinas:

Caluguran cung Capatad, milabas ing limang dalang banua iniang ing balitang Cristiano dinalakit ya king Filipinas. Tinggap ye ing tula ning Mayap a Balita: ing mayap a balitang paindikilan king bina naca tamung caluguran ning Dios layun binie ne kecatamu ing keang Anac. At iting tula mayayakit kecayu. Akakit mi iti caring kecong mata, caring kecong lupa, caring dalit yu ampon panalangin. Ing tulang magdalang casalpantayanan caring aliuang lugal. Maralas cung sasabian king keti Roma king ding Filipina ila ring darake casalpantayanan! Ampat nu la man caring magobra, payabut da ing casalpantayanan. Atiu na king kecong daya, ing nuan a macpayaua a maniulung kecayung maniadsad. Manatiling daralan ing casalpantayanan caring aliua, ing mayap a balitang tinggap yu lima nang dalan a banua ing milabas. Ulinita, buri ra cong pasalamatan, para king dulang darala yu king yatu ampon caring comunidad tamung Cristiano. Siguru, anti ing sinabi cu, caring sablang mangasampat a caranasan caring familia keti Roma - dapot pati na king mabilug a yatu - nung nu ing malambis ampon masigasig yung panga-atiu milliari lang patune ning casalpantayanan. King daclat di Maria ampon Jose, pauling malugud yang magdalang tula ning casalpantayanan capamilatan ding mapacumbaba, pacasalicut, masicanan ampon manatiling casuyuan.

Caniting pecamaulagang anniversario ning banal ang balayan ning Dios king Filipinas, buri ra cayu namang sumulung king dapat ning pamipasiag king Mayap a Balita - e king pangonverte, a mialiua caniti. Ing Cristiano yung pamipasiag a kecong tinggap mangailangan yang idake parati caring aliua. Ing mensaji nang Mayap a Balita ning pangalapit ning Dios sasio yang malugud a miyablas caring kecatamung capatad. Nasa ning Dios king alang mate. Uli na niting sangcan, aduan na king Capulungan ing sumese caring magcacasakit ampon mabibie king bingit ning bie. King lugud ning Dios para kecatamu binie ne kecatamu ing keang sarili, at ing Capulungan maki-capara ya naman caniting pangatubud. Meyaus ya ing Capulungan ban e matul nune ban malaus tangggap; e ban mutus, nune ban mnialbag bini; e ban mamarusa, nune ban idala i Cristong kecatamung caligtasan.

Talastas cung iti ya ing parasang pastoral ning kecong Capulungan: ing pamagtagulalibg king pangatuburan a nung nu la abe ring sabla ampon mipapayabut caring dacal. E co mimina lub cabang lalacaran ye iting dalan. E co tatacut ipasiag ya ing Mayap a Balita, ban sumuyu ampon ban lugud. Cambe ning kecong tula, asaupan yong sumabi ring tau dikil mu naman king Capulungan: "Bina nia namang caluguran ing yatu!" Casampat na ampon calagu ning Capulungang lulugud king yatung alang pamanusga, metung a Capulungang babie ing keang sarili king yatu. Yanasa, caluguran cung capatad, king Filipinas ampon caring sabla nang sicoti ning yatu.

*Calabi nang Apat ning Marso, Aduang libu Aduang pulu't Metung, carin Ciudad Vaticano, king Caualu nang Banua ning Pangakucluc na anting Papang Papa Francisco.

Ngeni, abe-abe tayang pangadian ing Panalangin ning Misiun a sari ming binaldug king Amanu tamung Sisuan:

O Dios, Malugud ming Ibpa, tinububud me keti yatu ing Anac mu ban ipasiag ne ing Mayap a Balita ning Caligtasan caring sabla: caring palpicasala, caring pacacalulu, caring mayayalipit, caring salunan, caring mipaimburisan ampon mipalacuan. 

Dinaun ne ing bie na king Cruz para kecami ampon sinubli yang mebie ban atbusan na cami ampon ibalic keca. Tinubud me ing Banal mung Espiritu caring Apostol ban isundu ra ing obra ning Anac mu ampon idala ring sabla king caligtasan.

Pasalamatan daka, O Ibpa, uling ibat king caralumduman dela mu cami king sala. King malugud mung tangca, Limang Dalang banuang milabas dinatang la ring Missionero king kecaming bansa ban ipasiag da ing Mayap a Balita nang Jesus a Anac mu caring pipumpunan mi, at iti mengaintulid kecaming maging balayan mu ampon Capulungan. 

Intabayanan na cami ning calam ning casalpantayanan king miparang dalumdum ampon sala, mag-uagi ampon managumpe king casalesayan mi anting balayan mu. Megi yang tune sala kecami ing casalpantayanan mi a saslag king caralumduman.

Ibayu mu kecami ing calam ning Espiritu mung pasikan kecaming maging patutu nang Jesus a Anak mu, king yatung mesira king caimutan, pamisagsagan,

cayalan catuliran, casakitan, ampon dusa. Tipunan naca mi sana ning kasalpantayanan mi anting anac mu ban lumingap ampon lugud king metung at metung. 

Pasicnangan na cami sana ning Banal a Espiritu ban ipasiag ing Mayap a Balita caring capatad mi keti Asia ampon caring sablang bansa. Ipagcalam mu kecami ing tutung magdulap king pamaniaup caring aliua ban cambe ning casalpantayanan makitagmu king Guinung Jesus ban makirake king tula mu ampon bie.

Abayan na ke sana ampon ipanalangin ning Nuan a Indu, ing Munag ning Pamipasiag king Mayap a Balita cabang mabibie cami ampon mirarake king casalpantayanan caring aliua. King matibe ming lugud ampon parangal keya anting Mal a Indu mi, gauan na ke sanang maging tune talatuki ampon patutu nang Cristo caring malda, parating macasadiang mituburan, ampon maging mapamintu king nanu mang aduan nang Jesus kecami.

Iti aduan mi king capamilatan ning Guinu ming JesuCristong Anac mu, a mabibie ampon mag-ari cambe mu, king cametungan ning Banal a Espiritu, Dios mangga man king alang angga. Amen.

Ing Banal a Capulungan abe taya ngening magsaya king tula ning bansang Filipinas king matula nang tagumpe ning Casalpantayanang payabut ning Guinu.

🤞DIOS PU!🤞

Marsu 14, 2021

Binaldug  at Belangcas 

na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king aguman ning DagísPisamban Kapampángan a midake at micalap

© Retrato