Marso 16, 1571 : Dinalakit Ya Ing Casalpantayanan

DINALAKIT YA ING CASALPANTAYANAN

King aldo Sabado, Calabi nang Anam ning bulan a Marso, banuang Labing limang libu Aduang pulu't Metung, i Ferdinand Magellan, caibat nang memun king islas ning Canoyas, a meaus pangaibat Landrones, a meaus meagpang king mepanacong bandi ding memalen, (ngening mayayaus Islas ning Marianas) maglayag king dane albugan magdulap king Moluccas, meakit a pulung maki matas a cabunducan.

Caring sumulung pang pamaniasat, caring mapilan a cantandang sinulat nang Pigafetta milicas yang anti caniti: "King muclat nang sumala ning aldo Sabado, Calabi nang Anam ya ing bulan ing Marso, banuang Labing Limang libu Aduang pulu't Metung, (cafiestan nang San Lazaro, digdag nang Gomez) mecasaca cami king capatagan a malapit... metung a pulung mipalagiuanan Zamal (Samar)... cabucasan (Aldo Domingo, Calabing Pitu ya ing Marso) ing mamuntucang layag birian nanh sumaca king sumangid a pulu (Humunu)... a e mipanucnangan... ban malliarinh lacuas ligtas ampon ban macasaclung danum at painaua. Menakacad yang aduang tolda king pampang para carinh salunan."

Pangaibat dang atuckasang its ing Zamal (king catanda nang Legaspi meaus ya iting pulu ning Cibabao), ing mayayaus ngening pulu ning Samar, king laut a atlung dalang liga ibat king pulu ning Ladrones. Cabucasan, king pamanuclas ibat king dayat, misaca king e mipanucnangang isla abayatan ning Samar a inaus nang Humunung Pigafetta, a kilala ngening Homonhon a barrio king Guiuan, Aslagan ning Samar.

Mitalacad yang minunang mitandang casulatan king Filipinas ding Europeo iting pamaglayag. Bista man ing tangca ning pamaglayag nang Magellan iya ing manintun dalanan king Abayatang America painturu king Moluccas, ampon ban magbalik king Espania cambe ring pampalasa, caniting dake ning pamaglacbe, micasigasig ya i Magellan para king pangaconverti ra king Cristianismo ding tribu carin.

Iti ya ing Calimang Dalan a Banuang Anniversario ning Pangadala ning Cristianismo keti Filipinas ampon ing paniatang ning Mapagmalang Larauan ning Señor Santo Niño ning Cebu caring kecatamung pampang, a migmula kinh Pangalaganap ning Cristianismo keti Filipinas.

PANALANGIN PARA KING CALIMANG DALAN NANG ANNIVERSARIO NING MAPAGMALA NANG LARAUAN NING SANTO NIÑO NING CEBU

Señor Santo Niño ning Cebu, ica ing manatili nang panga-atiu ning Ibpa king pamaglacbe mi king casalpantayanan. Cabang pagmasusian mi ya ing Calimang Dalang Anniversario ning Paniatang ning Mapagmala mung Larauan caring kekeng pasigan, aduan ming itubud me kecami ing Banal mung Espiritu ban malliari caming tapat mung alagad king malualas ampon maragul nang capulungan ning yatu ngeni. Mananu na sanang ing kekeng casalpantayanang Cristiano ampon malalam a devocion keca malliari yang ibatan ning pamagbayu king kecaming pisasautan cabang ume caming maglacbe painturu kecang mabibie ampon mag-ari mangga man king alang angga. AMEN.

Señor Santo Niño ning Cebu, 

Pacaluluan mu cami!

Marsu 16, 2021

Binaldug  at Belangcas 

na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king aguman ning DagísPisamban Kapampángan a midake at micalap