Santa Agueda

#QuetiKapampangan

Martis, Febrero 05, 2018 - Capagmasusian king Cafiestan nang Santa Agueda ning Sicilia. Virgen ampon Martir carin king Catania king Balen ning Sicilia, Italia iniang banuang 251 king utus nang Governador Decius. Ing Pepakit cang Santa Lucia ning Siracusa king cayang paninap. Patulunan da ring sablang mequisaquit king carelang susu.

Y Santa Agueda ning Sicilia mibait ya iniang banuang 231 king Catania o king Palermo king Balen ning Sicilia king metung a macualtang familia. Tatangalan ne ning Santa Iglesia bilang metung caring pecamatas a Virgen ampon Martir. 

Manibat pa iniang anac ya, inatna na ne ing cayang sarili cang Cristo. Pero macanta man, ing metung a paganong lalaki a magnasa cang Santa Agueda, y Quintianus, uling matas ya ing cayang pusisiun iniang panaun a ita, bala na apilit ne y Aguedang gulutan ing cayang pengacu at pilitan nang magpacasal ya caya. Ing cayang paulit-ulit a panucala tinanggian neng Agueda, ania y Quintianus, uling balu nang metung yang Cristiano iniang pamanlupig nang Gobernador Decius, dicpan de y Agueda at dinala de king arap ning jusgado. 

Y Quintianus ing jusgado canita. Ban apilitan nang magbayu ya pamanisip, pepasucul na y Agueda - king , pepasakitan ne, dapot ali ya metinag y Agueda. Migpatuluy ya pa mu ring ipasiag ing Mayap a Balita nang Cristo. Inutus na ning maroc a Quintianus ing bitayan de y Agueda king capamilatan ning pamagpatapias king cayang susu. Bayu de bitayan, pepasucul de ulit king utus a ali de pacanan ampon uluan. Dapot binie na ning Dios ing sablang cailangan na ban yang cumayap. Pepatilip ya cang Agueda y Apostol San Pedro, ban pacayapan ya ing cayang sugat king capamilatan ning cayang pamanalangin.

Caibat ning apat a aldo nang pangasucul, ali ne kinilalang Quintianus ing mapagmalang panga-ulu na ning cayang sugat. Linubas de at pegulung deng lubas caring maglagablab a uling a macayabe caring mataram a espada at tinanggal de ing cayang susu. Mete ya y Santa Agueda aduang-pulut metung ya edad a dinaun na ing keyang bie cang Cristo.

Y Santa Agueda ing Patulunan ning Balen ning Sicilia king Italia, Palermo, ding meaubusung babai at patulunan da mu naman laban caring api.

PANALANGIN CANG SANTA AGUEDA

O Guinung Dios, pigcaluban mung maracal a macabanuang calam ing Maligayang Santa Agueda. Damdaman mu ing panalangin ding sablang magbalikid king cayang mayap a bie at ding mamaus caya ban pasaup caya king carelang caculangan. Saupan mu caming ayapusan ing cayang cacayapan king cayang macayatung bie at acamtan mi ing alang-anggang ligaya cayabe na king banua. Iti ngan aduan mi king lagiu ning Guinu ming JesuCristo, a mabibie at magari cambe mu at ning Espiritu Santo, metung mu king panga-dios mangga man king mangga. Amen.

(Sabian taya ing kecatamung sariling capagnasan at ipangadi ing metung a Ibpa mi,

metung Bapu Maria, metung a Gloria)

"O JesuCristo, Guinu ding sablang bage! Acakit mu ing cacung pusu, balu mu ing capagnasan cu. Pagcalub mu ing sablang cacu - a ica mu. Acu ing kecang tupa; gauan mu cung carapat-dapat apagtagumpayan ing carocanan. "

- Santa Agueda ning Sicilia

Santa Agueda ning Sicilia. Virgen ampon Martir ning Santa Iglesia. Patulunan ning Balen ning Sicilia, Italia.

¡Ypanalangin Mu Cami!

¡Ora Pro Nobis!

¡Ruego Por Nosotros!

VIVA SANTA AGUEDA!!!!!! 

Meangu king mialiwang istorya ibat king

© Ding Mal a Patulunan:

Ding Tala'mpun At Talaingat 

Ning Balang Kapampangan

*Sidia ne ning #DagísPisambánKapampángan

Dispu keka tamu ngan!