Veni Creator Spiritus

Caniting Mumuna nang Aldo ning Banuang 2021, maus tamu anting metung a balayan king Mapamacalulung Dios king pamanalangin king Veni Creator Spiritus, metung a matuang panalangin para king mal nang casaupan caniting bayung banua.

Ing Veni Creator Spiritus, metung ya caring laganap a mekilalang Canto Gregorian a midaralit caring capagmasusian, at layun yang misasadia ban tanggapan ya caring pusu ing Banal a Espiritu. 

Bibilugan de ring pitung verso a manalacaran caring pitu nang calam ning Banal a Espiritu: ing Cabiasnan, Pamanintindi, Causucan, Sicanan, Beluan, Malugud a Cabanalan, ampon Malambis a Takut king Dios.

Meca keni, O Banal a Espiritu

Datunan mu lang kekeng caladua;

Datang cang cambe ning calam ibat banua

Capnuan mu la sa ring kekeng pusu.

O Talapamatula, keca ke maniaclaud

O maula nang calam ning Dios a Cacatascatasan,

O sibul ning bie ampon pali ning lugud,

Ampon mayubu nang calam ning cacatascatasan.

Ica cambe ring pitung calam mu,

Ica, O taliri ning gamat ning Guinu;

Ica, pengacu ning Ibpang mapamacalulu

A caring maldang dila, siuala 'yang babie mu.

Tagkilan mu caming banua ibatan,

Daptan mung lumapo ing lugud caring pusu mi;

Cambe ning capanayan ampon cabulasan

Layun mung ganap ing keinan mi.

Ilaut mu ke't ipaglualu caring casalang mi,

At keca ya sanang pagcalub ing capayapan;

Ban keting calam mu ampon caingatan,

King dalan ning bie e na ke pa malili.

Tapucanan mu cami king kecang gracia

Apurian yang Ibpa ampon Anac a maligaya

Cambe mu, miparangalang alang patna,

Metung a Dios, atlu king persona.

King Ibpa ampon king Anac,

A mibangun ibat king camatayan, miabe ing ligaya,

Cambe mu, O Banal a Manaplac,

King milabas, king casalucuyan, at king alang anga.

Amen. Alleluia!

Sumangid ning Cafiestan ning Pamanipa ning Banal a Espiritu (Pentecostes), micacanta ya naman ing Veni Creator Spiritus anting pamuclat king metung a maragul a solemneng capagmasusian anti ing mula ning Conclave, ing Pangatagulaling king Casuyuan anting Presbitero ampon Pangacorona ding Ari.

Iting laganap a mekilalang hymno gagamitan de ring Catolico dapot mayayakit king gagamitan dia namaj iti ding Protestante. Miyarap king pangakilala ampon leguan ning Veni Creator Spiritus, merapat neng pecantang corong Martin Lutter cari Komm, Gott Schöpfr, Heiliger Geist. Dacal lang talasunis ding binalikid caniting makilalang hymno anti di Johann Sebastian Bach a menalacarang coro caniting pacsa king keyang Orgelbuchlein.

Ing linalang king lyrico ning Veni Creator Spiritus e ya lubus akikilala. Ding licas nang casalesanan niting calalangan malliari yang menibatan king comical. Milapit  ya iti caring sibabanua king maula nang licas anti i Sab Ambrosio ning Milan (340-397), San Gregorio Magno (c. 540-604), Charlemagne (c. 742-814), ampon Rabanus Maurus (776-856). 

Lacuas lang maranun mayakit a milalang caniti diSan Ambrosio ampon San Gregorio. Cabang macayagnan ya i Charlemagne king pangalaganap ning Veni Creator Spiritus (micoronan iñiang Capascuan, Banuang 800), dapot mangapalliaring ing Canto micanta ya kecaban ning keyang pamag-ari. 

Mas lalapit de pa ing pangakilala ning miglalang king hymno cang Rabanus Maurus, a mangapalliaring caya ya. Mangapalliari pin cayang king i Maurus, miagyag caring amanu nang San Ambrosio ampon caring Canto nang San Gregorio, lelang ne ing hymno kecaban ning pamag-ari nang Charlemagne?

Babo ra reti, panalacaran nang W. G. Polack: “[Ing Veni Creator Spiritus] mipailalam yang lalu king Panga-Cristiano ding Albugan king ing nanu mang dalit a melalang king capanaunang Medieval e mu king Te Deum, iñia ditac mu ing pangakilala king miglalang caniti” (Tuntunan king Hymnariong Lutheran, Bil. 174).

Eneru 01, 2021

Binaldug na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king DagísPisamban Kapampángan