pana

Ing Banal a Niño, iya ing mumuna caring calam ding Castila cambe ning Casalpantayanang Cristiano. Iting larauan ning Guinung migpacumbaba yang miaslagan caring maldang Filipino painturu king Casalpantayanan.

Ing larauan ning Guinu tamung JesuCristo king aske na ning metung a anac, paganaca na kecatamu king metung yang Anac ing Guinu. E ya metung a ari keti sulip, dapot lacuas pa caniti, metung yang divinung ari. Pablasang tutu yang tau ampon Dios.

Ing Coronang macaputung king keyang buntuc, paganaca na kecatamu king I Jesus ya ing Ari ning meto sicluban.

King caili nang gamat atiu ya ing Orbeng maki-Cruz king cabuntucan, a mipapaganaca kecatamu king cayupayan ning Guinu a manibala king keyang cayarian capilan man. Inaclung nang Cristo ing sabla tamung pamicasala at migmatampa tamung maging balayan a keyang tapat a talatuki.

Atiu ne man king uanan nang gamat ing Setro, tanda ning maragul nang upaya ning Guinung Jesus king mabilug a yatu.

Macagani ya king Maputing Imalan, sagisag ning calinisan, cabanalan ampon ing ligaya ning pamaniubli nang mebie ning Guinu.

Babo na niti, macatumpac ya ing Malutung Capa, king pamigaganaca king marapat yang dumalan casakitan ampon camatayan ing Guinung JesuCristo ba' naca tamung icabus king casalanan tamu.

Miagyagan tamu king metung a Casalpantayanan, lalam ning metung a Ari ampon Guinu, i JesuCristo king larauan na ning Mal a Santo Niño ning Siudad ning Cebu kecaban ning Limang Dalan a Banua ampon caring daratang pang panaun.