Ing Pamitilip ning Nuan a Virgen Maria king Pilar.

Capigaganacan Aniversario ning Pamipatilip ning Nuan a Virgen ning Del Pilar cang Santiago Mayor Apostol carin king Zaragosa, bansang España iniang ca-02 ning Eneru banuang 40. 

ING CASELESAYANG NING PAMITILIP

NING NUAN A VIRGEN MARÍA KING PILAR

Caibat ning Pentecostes, ding 12 Apostol micaua-cauani la ban ipasiag ya ing Mayap a Balita king mabilug a yatu. I Santiago Mayor, king metung caring pamaglacbe na, igyagan nala ring tau carin Peninsula Iberica a ngeni ausan dang Españia. Ing tradisiun sasabian na kecatamu king caibat ning pitung banua nang camatayan ning Guinung Jesus, kin Cadua ning Enero, banuang 40, ing Apostol Santiago Mayor, ing capatad nang San Juan, mipainaua yang medisgustu carin king bebe ning Ilug Ebro a ngeni ing Zaragoza, Españia. Ding memalen ning Romanong lalauigan ning Hispañia (Españia o Peninsula Iberica) e la pacabuclat ampon tatanggap king Mayap a Balita ning Guinung Jesus at macasadia neng sumucu i Santiago king keyang pamagcapilit mangaral carela. Ketang aldo ita ning Enero ing Nuan a Virgen Maria, a mibie-bie carin Palestina, pepatilip ya cang Santiago babo ning metung a asias o pilar ning batu. Cambe ring macapasicanang amanu, siguraduan ne king ding memalen ning Hispañia magi lang Cristianos ampon king ding carelang casalpantayanan magi yang casing tibe manalacaran anti ning asias a tutucluan na.

Binie ne ing asias ampon ing imajen cang Santiago ampon iñiauad nang mitalacad ya ing metung a pisamban carin king lugal a ita king keyang carangalan, gagamit caretang aduang bage king altar.

"Magi yang pibale-bale cu ing lugal a iti, at iting imajen ampon asias magi neng bantug ampon altar ning templo a italacad mu... at ding sablang memalen na niting lugal parangalan deng emu nanu ing Anac cung i Jesus."

Caibat nang iñiauad nitalacad metung a pisamban para keya, pasibayu yang mengacu king:

"Manalacaran ya ibat king penandit a ita angga king capupusan na ning panaun ban canita mirapat yang mala ampon macapagmulalang bage ing Guinung Dios king canacung pamamilatan para caring sablang mitatagulaling lalam ning canacung pamaglualu."

Ban ganacan ing pamipatilip ampon pangacu ning Nuan a Virgen Maria, ing mumunang diling Dambana ning Virgen Maria mitalacad ya macapadurut king asias.Menalacad yang malating capilia i Santiago anti ing iñiauad na ning Nuan a Virgen, busal ning Ilug Ebro carin Zaragoza, Españia, ing Minunang diling mekilalang Dambana king Virgen Maria king casalesayan. Megi yang bantug anting Indu carin king Asias, o Nuestra Señora del Pilar. Ing capilia miyalilan yang mangaragula pisamban kecaban ding panaun, ing maulang basilica ngening casalucuyan mitalacad ya iñiang calabing pitung siglo.

Sabadu • Eneru 02, 2021

Binaldug na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king aguman DagísPisamban Kapampángan a midake at micalap

para king mialiwang istorya at panalangin ning:

© Maria: Ing Mialiwang Aske at Panamdam

*Sidia ne ning DagísPisambán Kapampángan