CAGALAYAN KING GUINUNG NIÑO JESUS DE FRAGA

CAGALAYAN KING GUINUNG NIÑO JESUS DE FRAGA

O Migpacumbabang Guinu,

O Santo Niño ning Cebu:

Cababan mu't camusmusan,

Tukian mi't layun apusan.

King carampatan mung banua,

Ketang labing adua cang tua,

Ring pengari mung mingatba,

Malaus dela ra na ca,

King Templo na ning Dios Ibpa.

Cababan mu't camusmusan,

Tukian mi't layun apusan.

Ketang Aldo Pamaglagpus,

Tinagun co ping malaus,

Sangcan cayung migmasusi,

Catungculan yu pin iti,

Ibat king matua yung dayi.

Cababan mu't camusmusan,

Tukian mi't layun apusan.

Iñiang atuparan yu na,

Ing tungcul yung sabla-sabla,

Ica, Guinu, melacuan ca,

King Templo ning kecang Ibpa,

Pigunaman ding aral na.

Cababan mu't camusmusan,

Tukian mi't layun apusan.

Iti e ra camalayan,

Pengari mung pacamalan,

E ra lubus isipan,

Nung nu ca kepupuntalan,

King ping Siudad a degulan.

Cababan mu't camusmusan,

Tukian mi't layun apusan.

Maibug nong maspac a salu,

Pintun ra ca anggiang kenu,

Carin mang camag-anac yu,

Carin pang kecong catotu,

Iñia migbalic lang tutu.

Cababan mu't camusmusan,

Tukian mi't layun apusan.

Templo carelang belican,

King ba' raca ping pantunan,

Ikit da ca pin busal da,

Makisabi caring biasa,

Dikil king Mal yung Doctrina.

Cababan mu't camusmusan,

Tukian mi't layun apusan.

Pengari mu mengasdan la,

Lacuas mengapamulala,

Indu mu kitnangan na ca:

"O bungsu cung caluguran,

O't iti kecang depatan?"

Cababan mu't camusmusan,

Tukian mi't layun apusan.

Ngana pang Indung Maria:

"Acu't ing Ibpa mung Jose,

Lubus keng migaganaca,

Penintun ra ca pang tune,

Keni ping Templo atiu ca."

Cababan mu't camusmusan,

Tukian mi't layun apusan.

Sangcan mu yang pekibatan,

E king alang cagalangan,

Ngamu: "O't pintun yu cu pu?

Kecayu na sa pung baluan,

Bale ning Ibpa datunan."

Cababan mu't camusmusan,

Tukian mi't layun apusan.

Keta ping kecang simbitla,

Aintintian tutu ali ra,

Pengamanuan mu maula.

Tinuki naca carela,

King Nazaret a tibuan da.

Cababan mu't camusmusan,

Tukian mi't layun apusan.

Maria iti sininup na.

Sinulung pin dinagul ca,

Mayap cataua't caladua,

Biasa ca ampon matampa,

King arap na ning Dios Ibpa.

Cababan mu't camusmusan,

Tukian mi't layun apusan.

Cristo Guinu mi ngang sabla,

Caring anac malugud ca,

Ila ping mapagcumbaba,

Pablasang king capara ra,

Bandi rang calam ning banua.

Cababan mu't camusmusan,

Tukian mi't layun apusan.

ANTIFONA:

Ing Divino Verbo micatauan yang tau.

- At mekisaut ya kecatamu.

PANALANGIN NING PAMAGTAGULALING 

KING GUINUNG NIÑO JESUS NING CEBU

O Guinu ming Niño Jesus,

Ica ing kecami Ari ampon Dios, sasamban daca.

Ica ing masicanan ming Talapaglualu, 

daralung cami keca.   

Ica ing patulunan ning Cebu,

ning Filipinas ampon ning mabilug a yatu,

lalapit cami keca; depatan mu ing micacaragul a bage

capamilatan ning Larauan mung Mapagmala

careting mepili mung capuluan, ganacan mu ke sana.

Balicdan me iting malucang caladua

a sasantung kecang maniaud casaupan.

Antabayanan mu cami king kecang cabiasnan;

iubug mu cami cambe ning kecang catutuan;

pamatulan mu cami cambe ning kecang ganaca,

cambilan mu cami cambe ning kecang sicanan.

Tatagulaling mi la ngeni keca ring caisipan mi,

ica mu ing bucud a manibala careti;

tatagulaling mi la ring kekeng amanu 

a icang bucud ing papasiag rang capurian,

tatagulaling mi la ring kekeng casakitan

ba' mi lang apibatan alang-alang keca.

Manigapu cami keca, O Guinung Niño Jesus,

pamasalan mu ing caisipan mi ampon capagnasan,

linisan mu cami pamicacatauan,

papagbanalan mu cami calada.

Aduan mi ing nasa mu,

ampat aduan mu ing para kecami.

 

Ipagcalam mu sana kecami,

O Macamal a Guinung Niño Jesus,

ing camtam mi ing lugud ke keca

maging tapat caring sarili mi,

maging masigasing caring capara mi,

at isacuil la ring sablang macayambal keti yatu.

Saupan mu caming alagpusan

ing aus ning laman cambe ning matulid,

ing caimutan cambe ning pamaglingap,

ing mua cambe ning ganaca,

ing catamaran cambe ning masigasig a dapat.

Papaliarian mu caming 

maging biasa king pamamie causucan,

maging masican lub king caligaligan,

maging mapibabata king pamisagsagan,

maging mapacumbaba king casaplalan.

O Malugud a Guinu ming Niño Jesus,

ituru mung alang ulaga ing yatu,

ing sampat na ning banua, cuyad na ning panaun,

ampon ing caba na ning alang angga.

   

Ipagcalam mu kecami, catataulian,

ing aganaca ra ca, asamban daca,

aluguran daca, ampon asuyuan daca keti sulip

ba' keng maging matula cambe mu

mangga man king alang angga. Amen.

Eneru 17, 2021

Binaldug na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king aguman ning DagísPisamban Kapampángan a midake at micalap para king mialiwang istorya at panalangin ning :

© Ding Mal a Patulunan: Ding Tala'mpun At Talaingat

*Sidia ne ning #DagísPisambánKapampángan