Te Deum Laudamus :

Caniting Ca-31 ning Deciembre,

mipagcalam ya caring maldang talasalpantaya ing Indulgencia Plenaria king pamakiagum king pamanalanging abe-abe king Te Deum, metung a maulang panalangin ning capurian ampon capasalamatan king Cabanal-banalan a Trinidad para king keyang canuanan ampon pamanalastas king keyang caburian caniting banua.

Ica ing Dios a bucud ming pupurian;

Ica ing Dios a lubus ming parangalan;

Ica ing Ibpang alang angga:

Ding sablang lelangan sasamban daka.

Icang undu-sundung pupurian da,

Ding angeles ampon upaya ning banua,

Ding Querubin ampon Serafing mausta,

Icang bucud daralitanan da, ngara:

Banal, Banal, Banal ya ing Guinu,

ing Dios a masicanan at mayupayang tutu,

Ing banua ampon yatu king ligaya mu mangapnu.

Icang pupurian dang alang patna,

Ding Apostol a maligaya.

Ding profetang maldang mangaula, 

Abe-abe lang pupuri keca.

Ding matenacang Martir pupurian daca.

Ing mabilug a labuad a nung nu ing Santa Iglesia,

Pupuri, parangal, at sasamba la keca.

O Ibpa ning alang anggang ligaya,

O Cabugtungan Anac a capuri-puring matampa,

Icang maligayang macalucluc king uanan ning Ibpa.

Sasalpantayanan ming pasibayu datang ca,

Datang cang paninasan ming Ucum ding malda.

Cambe ring Banal mung  mipnung dangalan,

Idala mu ke sa king ligayang alang capupusan.

Kecaban ding aldo ning bie mi icang pupurian.

Sasamban mi ya ing lagiu mu capilan pa man.

Cambe ning Banal a Espiritu, talausuc at talaingat mi.

Ica, O Cristo, ing maligayang ari,

Ing alang angga nang Anac ning Ibpa,

Dangal, ligaya at capurian keca.

Iñiang micatauan cang tau, ban icami ing itimaua mu:

Ing sepupunan ning Virgeng Casantu-santusang tutu,

E ya mebauas linang, ampat calinisan pepanatilian mu.

Sinaul mu ing lasun ning camatayan,

Biclat me pang layun ing banuang cayarian

Caring sablang keca atin casalpantayanan.

Meca, ulinita, O Guinu, at saupan me ing balayan mu,

Ing balayan mung inatbus uli ning macamal mung daya,

Icabus me ing balayan ku, O Guinu,

Panuanan me king kecang gracia.

Panibalan me ampon tairan ngeni't capilan man.

Ilaut mu cami ngeni king sablang casalanan.

Pacaluluan mu cami, 

Guinu, pacaluluan mu cami.

Guinu, ipakit mu ing lugud mu't pacalulu;

Uling ica ing bucud ming panaligan.

Manalig ke keca, O Guinu:

E ke capilan manalig king calaraman.

V. Mipuri ca, O Guinung Dios ding kekeng pipumpunan.

R. Matampang purian at paligayan capilan man.

V. Purian taya ing Ibpa, ampon ing Anac, 

ampon ing Banal a Espiritu.

R. Purian taya't paligayan capilan man.

V. Mipuri ca, O Guinu, king banuang matibe telacaran.

R. Purian me ing Guinu, O caladua cu,

R. e mu sa cacalimbatauan 

ing sabla nang pepanabang keca.

V. O Guinu, pakiramdamab mu ing panalangin cu.

R. Damdam ca sana king aclis cu.

Diciembri 31, 2020

Binaldug na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king DagísPisamban Kapampángan