San Esteban. Diacono at Protomartir

PASCÚNG MÁYAP NING DISPÛ!!!” 

Capagmasusian ning Cafiestan nang 

San Esteban Diácono ampon Proto-Mártir.

balang Diciembri 26. 

 

Ing Pecamumunang Mártir king casalpantayanan iniang banuang 36. Patulunan da ring sablang Diácono.

Micalatang la mua iniang dimdam da iti cang Esteban, at mititigis la ipan king mua ra caya.

Dapot i Esteban, kipnuan ning Espiritu Santo, tinalanga ya banua at ikit na ing caligayan ning Dios at i Jesus atiu king uanan ning Dios. 

"Lauan yu! Acakit keg mibubuclat ing banua," nganang sinabi, "at ing Anac ning tau atiu king uanan na ning Dios." Cabud dimdam da iti ring galame ning Sanhedrin, kinulisac lang masican cagnan ning ticupan do ring balugbug da, saca re delusungan. Keladcad deng liual king ciudad, at pemucul deng batu. Ding sacsing mangalaram a menyira caya licas da ing carelang imalan at licuan da king arapan ning metung a cayanacan a milagiuan Saulo.

At cabang pamuculan deng batu, i Esteban nganang mamaus king Guinu, "Guinung Jesus, tanggapan me ining cacung espiritu!"

Caibat, siniclaud ya king gabun at kilait nang masican, "Guinu, e mu sa ipapatan carela ing casalanan a iti!" Cayagcas da reting amanu, mepatad ya inaua.

Panalañgin cang San Esteban. 

Ing Mumunang Mártir 

O Ibpa ming Mayupaya, pagcalub mu na quecami ya sanang atularan ing quecaming parañgalan ngeni ban abalu ming luguran mu naman ding quecaming casalang pacundañgan qñg pamagmasusi mi qñg quebaitan na qñg banua ning Mapibabatang San Esteban, a biasang mañgadi para caring cayang casalang. Iti ñgan aduan mi qñg capamilatan nang JesuCristo Guinu mi, a mabibie ampon magari cambe mu at ning Espíritu Santo, mangga man qñg alang angga. A M E N.

(Sabian taya ing sarili tamung capagnasan at ipañgadi ing metung a Ibpa Mi, atlung Bapu María, metung Ligaya)

San Esteban. Diácono ampon Mártir ning Casalpantayan. Patulunan da ring sablang Diácono.

¡Ipanalañgin Mu Cami!

Meangu king mialiwang istorya ibat king

© Ding Mal a Patulunan:

Ding Tala'mpun At Talaingat 

Ning Balang Kapampangan

*Sidia ne ning #DagísPisambánKapampángan

Dispu Quecatamuñgan!