San Nicolas de Bari

06 DICIEMBRE 2021 | SAN NICOLAS NING BARI: ING ANINO NANG SANTA CLAUS NGENING DARATANG A CAPASCUAN

Neng tutud ya ing Canam ning Diciembre, pagmasusian ne ning Capulungan Catolico ing Cafiestan nang San Nicolas, Obispo ning Myra canitang Capat a siglo, a mipaparangalan mu naman king Capulungang Ortodoxo at mitutulid manga mamalino king aske nang Santa Claus.

Ala nang aliuang lugal masampat pipagmasusian king Panaun ning Adviento nung e mu ing Betlehem, ing carinan nang picabaitan Jesus. Caniting panaun ning pamanenaya, gaganacan ne ning Piapactan nang Liturgia ning Róma ing metung a macapasubaling banal, metung a nuang minie malalam a yamut ampon tanda king tradicion ding tau-Albugan neng Capascuan. Ya i San Nicolas ning Bari, ing Cristianong Obispo a minie anino king aske nang Santa Claus.

Misapuac ya carin Patara di Licia, metung a ciudad a macabebe king Abayatan ning Pais manga banuang Adduang ralan Pitung pulu, miliari yang Obispo ning Myra, a macacarin king caparis a labuad ming Asia Menor. Mibie-bie ya pilatan ning Catlu't Capat a siglo, a nung nu malino ing pamanalipit ding sugi caring e ra man pigmasabalang Bininiagan, pati na i San Nicolaa. Lalam nang Emperador Diocleciano, mesucul ya ing banal ning Patara pauli ning casalpantayanan na cang Cristo, at saca ne mu timauang Constantino canitang banuang Atlung dalan Labing Atlu, nung capilan ne sindu ing cararaptan nang pamanibala.

Iti ya ing panaun nung capilan asne pa cayanacan ing Capulungan, king capanaunan ning Cautusan ning Milan ampon ning Capulungan ning Nicea (banuang Atlung dalan Adduang pulu't Lima) nung nu ya, mecad, mekigayo i San Nicolas. Balu tamu agpang caring Casulatan da ri Andres ning Creta ampon Juan Damasquinado, king kilala ya king panga-mayamut caring principios ning Casalpantayanang Catolico. Balu tamu na naman king pangimut na anting Obispo ning Myra, icua nang mecapamie caring mangailangan a carinan ban munie busal ning salut a dinugpa king keang ciudad, manga micaritac king adduanang papabal ning Imperio. Meangu ne man bie carin Myra, king Canam ning Diciembre, banuang Atlung dalan Atlung pulu't Pitu.

Ding reliquias nang San Nicolas pacasinup la king Catedral ning Myra angga king Calabing Metung a siglo, nung nu pauli ning picatacutan dang mibual la caring buangis canitang Muslim, linipat do ring grupo ding gagaud a tau Bari ring keraclan king keang bangke, saca re licuan ming Bari canitang Casiam ning Mayo, banuang Libu't Ualung pulu't Pitu. Uli na niti, angga ngening casalungsungan, migaganacan ya anting San Nicolas ning Bari liuas king bangsag a San Nicolas ning Myra. Ing cadua nang pamanlipat mipaliari ya king pamagdala caring mitagan king bangke nang San Nicolas king Myra pauli ding mapilang tau-Venecia, calabas ding apulung banua. Dela ro ding babangse ning Serenissima king Venecia ding mapilang bubung butul ibat king bangke nang San Nicolas, at angga ngening macasinup king Pisamban nang San Nicolas carin Lido.

Manibatan la king tradicion ding aliua pang pamangilala dikil kea, nung e mu mismung ibat caring amlat. Mabantug ya iting banal a bininiagan king pangatulid na cang Santa Claus uli ring mapilang capaliarian king bie nang San Nicolas a mipasa-pasa king keluatan a panaun. King catutuan a meninfluencia la pa ring aliua king pangapaliari ning aske nang Santa Claus, ya ita pang binangun nong San Nicolas ding atlung anac a pete ning metung a maliap a buangis. Ya pa iti ing pepamansag cang Ssn Nicolas anting "talapanlualu ding anac". Ya na iti ing peyalingongo kecaban ning panaun at lalagpus caring pilatan ning cadayatmalatan ning Mediterania angga king miras ya king labuad ning Europa. Uli na niting sangcan, i San Nicolas ning Bari pa mu rin ing patulunan ning labuad a Lorena king Francia, ning meto Ruso (pauli nang dili ning tradicion ding Macayaslagang Ortodoxo), ampon ning ciudad Amsterdam king Holandes. Macayamut yang malino kinh Amsterdam ing palagiung Santa Claus a binang bantug meto yatu, meangu king Sinterklass, ing lagiu nang Holandes San Nicolas.

I San Nicolas ing tete pilatan ning Aslagan ampon Albugan, ya ing bubuclud king capalsintan ding sablang bininiagan.

King Banal a Ciudad, yang patulunan na't talapanlualu ning Beit Jala, metung a ciudad palestino, nung nu balang tumud ya ing Calabi nang siam ninh Diciembre (king aldo Ortodoxo), misasamac nong mitipun king keang caglo ding sablang bininiagan caring miyayaliuang sectas: ding Ortodoxos, Catolicos, ampon Protestantes. Dacal nong pitulid a mala ring talasalpantaya carin Beit Jala king nesambitlang banal; antimo king mesabi ketang Libu't Siam a ralan, Apat a pulu't Ualu, ikit neng Padre Giacomo Guiseppe Beltritti (a meging Patriarca Beltritti) i San Nicolas a cacambil kea caring payacbung king icalualu ning lacanbalen, a pesulung king pari ban idalum ya carin Roma. Anting pakibat, mioarala yang larauan nang san Nicolas ing Vaticano king Beit Jala a milucluc king Pisamban ning Pamamalita cang Maria king keang icarangal.

PANALANGIN CANG SAN NICOLAS NING BARI PARA CARING MIYAYALIUANG CAYADDUANAN *

O lusuc mipuri't mirangal a pamuntuc a pari, Maringal a Palpimala, Banal nang Cristo. Banal a Ibpang Nicolas, Banal ning Dios ampon Talasuyung Tapat, Taung Malugud, Mepiling Dapucanan, Matibe nang Asias ninh Capulungan, Mayaslag a Sulugi, Batuin a Saslag ampon Pasala king Meto Yatu; metung cang taung matulid a sinulung anting tanamang palaspas a mitanam king camalan ning Guinu; king kecang pamagdatun carin Myra, pesingalngal mu ing banglu ning myrra, saca mu ne man tinapuc ing capilan mang mamagus a myrra ning gracia ning Dios.

Pauli ning kecang pangayatiu, O lusuc banal a Ibpa, mipabanalan ya ing cadayatmalatan iniang midala la king ciudad ninh Bari ding tutu mung palpimalang relikias, ibat king Aslagan angga king Albugan ban yang purian ing laggiu ning Guinu. 

O binang Maringal ampon Masicanang Palpimala, Marapal a Sasaup, Marugal a Talapamilatan, Mayap a Pastul a tataid king malambis a cauan ibat caring sablang caligaligan. Paligayan raca't pupurian anting Capanayan ding sablang Cristianos, Sibul ding Mala, Talapanlualu ding Talasalpantaya, Tutung Biasang Talaturu, Papacan caring Danupan, Tula ding Magmalun, Imalan ding Lubas, Talaulu ding Salunan, Mumulin caring Lalayag king dayatmalat, Titimaua caring Mesucul, Sesese ampon Cacambil caring Mebalu ampon Mengulila, Talaingat ning Calinisan, Malambis rang Talaturu ding Anac, Talasaup ding Mangatua, Talataid ding Mangilag, Capainauan ding Gugusal, Mabunga rang Pibandian ding Pacacalulu ampon Pangailangan.

Lingusan mu cami sana, ikeng daralum keca manga dururup payampun keca, mamilatan ca sa' para kecami king Cacatas-catasan, saca mu sa' ipayabut capamilatan ning pamamilatan mung macayama king Dios, ding sablang macasal king icacabus ding kekeng caladdua't catauan; lingapan me capamilatan ning kecang casaupan iting banal a pacasautan (o caya: iting templo), ding silalacanbalen ampon sibabalen, ding sibabangsang Cristianos, ampon ding sablang maratun careti, ivat caring sablang pamanalipit; pablasang taruc ming ing panalangin ning taing matulid tutu yang macanauang mayap; at caibat ninh Canunuanan a Virgen Maria, icang dururupan ming macatalaruang talapamilatan kinh Lubus Mayupayang Dios, manga adduan ming mipnung cababan ing marugal mung pamamilatan ampon cayampunan.

Daptan mu sana, anting metung a masimpan ampon mayap a pastul, ing cambilan mu cami ibat caring sablang casalang ampon salut, ayun ampon lipat, laui, albug ampon silab, calis ampon pamaniacup, pati caring sabla ming tagcu ampon pamagcacasakit; catulan ke sanang saupan manga musni caring pasbul ning cayapan ning Dios; pablasang e ke mangaintulid talanga king cacatas-catasan a banua pauli ring keracalan ming pamicasala; macagapus ke king tanicala ning casalanan saca mi pa e pemintuan ing caburian ning Miglalang kecatamu, ni sinimpan caring keang cautusan.

Inia, sisiclaud ke king Miglalang ming ayaspac mi pusu't malam a lub, manga adduan mi ing kecang pamamilatan king Ibpa; nung lumasa ke pauli ring kekeng casalanan, icabus mu cami caring sablang maroc, ampon caring sablang bage mamambal; pamanuntunan mo ring kekeng caisipan at pasicnangan mo ring kekeng pilubluban king tune Casalpantayanang e cuculang, capamilatan ning kecang pamamilatan, maski ring sugat, ligalig, salut, ni ing mua ning kecatamung Miglalang; dapot ipagcalam mu sanang munie keng mipnung capauman keti sulip manga tangal caring bage mayap king labuad king mabibie, paligaya king Ibpa, ampon king Anac, ampon king Banal a Espiritu, metung a Dios a mipapaligayan ampon misasamban a Trinidad, ngeni't mangga man king capilan pa man. YANASA.

*Iting pangaddi maliari yang pangaddian anting pamagsiam a capiyaddian king cafiestan ning mesambitlang banal.

SAN NICOLAS NING BARI,

Patulunan ding Mumulin ampon Anac:

— Ipanalangin mu cami.