first saturday

PAMUCLAT A  PANALANGIN  ALDO-ALDO 

Panalangin king Calinis-linisan nang Pusung Maria.

Pusu nang Maria, a Indu ning Dios, at keca tamung Indu, pusung cairug-irug, tula ning calugud-lugud a Trinidad, at carapatdapat king sablang cagalangan, palsintan ding angeles ampon ding tau, pusung uauangis dili king Cabanal-banalan nang Pusung Jesus, ica ing ganap nang larauan; pusung mipnung cayapan, parating carame king kecaming pamagsalbat, daptan mong palambutan ring mangasias ming pusu, at alilan mo king uangis ning Pusu nang Jesus. Payagus mu carela ing lugud king kecang cayapan, palablaban mo king mipanuanang aping parating mitatau keca.

Papaliarian mung akit naca ning Banal a Capulungan anting santungang mipnu king caligtasan ampon casnguan, batiauan ca mong magsilbi nang sicanang pauang masicanan busal ding pamagalsa ding keang casalang, ica sana ing maliari nang dalan a tuntunang miuli kea cang Jesus, ica ing maliaring alulud a piagusan ding kegana-ganang graciang cailangan para king kecaming caligtasan, layun maliari raca sanang casaupan king oras ning pamangailangang adaluman ming casngauan busal ning caligaligan, kecaming sicanang mangilag king penandit ning tucsu, kecaming santungang apagsaldacan busal ning pamipasakit, kecaming cambilang maglualu king penandit ning caligaligan, dapot lacuas na king tauli nang siguc ning kecaming bie, king oras ning kecaming camatayan, potang ing meto infiernos mibulus ya laban kecami ban paglayunan rang gamitab la ring kecaming catauan, inia king macatacut a penandit a itiang binang macapangulabut, pagsantungan raca O malugud na Virgen, iparamdam mu kecami ing masabsab mung yumu ning pusu mu anting Indu, ing casampatan at sicanan ning kecang upayang mamilatan king Cabanal-banalan nang Pusung Jesus, inia mibubusni keca, ing pecasibul ning pacalulu, matibe mong cuta, ban canita icami mu naman misan a aldo, acasaut raca king Paraiso king matulang pamamuri king Cabanal-banalan nang Pusung Jesus mangga man king alang angga. YANASA.

 Makilala ya sana ing Cabanal-banalan nang Pusung Jesus ampon ing Calinis-linisan nang Pusung Maria, layun mapun, mipuri, mipamalsintan, ampon mipaligayan la sa nu man carin king capilab man. YANASA.

Tunggen ing Rosario

DAPAT A CAPAMAYARAN KING CALINIS-LINISAN NANG PUSUNG MARIA CARING MUMUNANG LIMANG SABADO

O Casantu-santusang Virgen, pacamalan ming Indu, masisindac cung makiramdam king sasio ning Calinis-linisan mung Pusung pacapadurut caring sucsuc a puputung ring taung alang pasalamat at king balang penandit ning carelang capasimbalangan ampon kealan utang a lub, migiagan king tapat a capagnasan ning lugud keca anting kecaming Indu ampon maniadsad king tuneng pamagdevocion king Cabanal-banalan mung Pusu, ume caming dururup king kecang cabitisan yayauad pamasoluan ing kecaming pamagsalbat carinh sucal rang pepasari ding tau keca ban mamayaran capamilatan ding panalangin mi't pamagsacrificio para caring pamicasalang iblas da ring tau king amanu mung lugud. 

Pakirasan mu para carela ampon para na mu naman kecami ing capatauaran caring e pabilang a casalanan king metung mu sanang amanu camtan ing gracia't capagbayuan para kacami ngan. Piraplan mu, O Señora, ing pamaniubli rang lub ding macasalanan ban luguran de i Jesus at patugut nang maniugat king Guinu, a bina nang magcadakit at ban e la mitalabu kinh infiernos. Balicdan  Mu  cami  caring  mata  Mung  mapamacalulu,  ban  manibat  ngeni  aluguran  mi  ya ing  Dios  king  cabilugan  ming  pusu  cabang  atiu  ke  keting  king  yatu  at  magtamasa  na  ke  man Kea  carin  banua  mangga  man  capilan  Yanasa.   

ING  DAPAT  PAMAGTAGULALING  KING  CALINIS-LINISAN  NANG  PUSUNG  MARIA 

O Maria,  mayupayang  Virgen  at  Indu  ning  Pacalulu,  Reina  ning  Banua  at  santungan  ding palpicasala,  tatagulaling  mi  ing  kekeng  sarili  king  Calinis-linisan  Mung  Pusu. Tatagulaling  mi  Keca ing  cabilugan  ming  panga-tau  at  ing  kegana-gana  ming  bie,  ing  sablang  atiu  kecami,  ing  sablang lugud  mi,  at  ing  sablang  icami.  Keca  babie  mi  la  ring  kekeng  catawan,  pusu  at  caladua.  Keca daraun  mi  la  ring  kekeng  pibale-bale,  familia  at  bansa. Pagnasan  mi  king  ing  sablang  bage  atiu kecami,  at  ing  sablang  bage  dikil  kecami,  makirake  caring  calam  ning  maca-indu  Mung canuanan  at  caring  bunga  na  niti.  At  iti  sanang  pamagtagulaling  tune  yang  maging  mabisa  at manatili,  a  babayuan  mi  caring  bitis  Mu  king  aldo  ngeni,  O Maria,  ding  pangacu  ning  kakeng Biniag  at  ning  kekeng  Mumunang Pamakinabang.  Magtantu  ming  mipasiag  mipmung  tetagan  king sablang  panaun  ing  catutuan  ring  kecatang  Banal  a  Casalpantayanan  Catolika,  at  mibie-bie anting  Catolico  king  lubus  a  pamipailalam  caring anggang  utus  ning  Santo  Papa  at  ding  Obispo king  pamakisamac kea. Ipangacu  mi  ing  kekeng  sariling  tupad  caring  cautusan  ning  Dios  at  ning Santa  Iglesia  lalung  lalu  na  king  pamipabanal  king  aldo  Domingo. Pagcapilitan  ming  cumaul  king aldo  aldo  ming  pamibie-bie,  angga  mu  ring  maliari,  ring  macapasno  nang  caugalian  ning casalpantayanan  Cristiano  at,  babo  ning  sabla,  ing  Banal  a  Pamakinabang . Ipangacu  mi  Keca,  O maligayang  Indu  ning  Dios  at  mayubung  Indu  ning  tau,  ing  pangabalanan  mi  caring  mabilug ming  pusu  Ing  devocion  king  Kecang  nuan  a  casuyuan,  lalu  na  ing  pamangading  Rosario,  ban keta  pamaliguanan  mitapatutuanan,  kapamilatan  ning  pamag-ari  ning  Calinis-linisan  Mung Pusu,  ing  cayarian  ning  calugud-lugud  Mung  anac, caring  caladua  mi't  caladua  ring  sabla  a magcarinan  king  pacamalan  ming  bansa,  at  king  cabilugan  a  yatu,  keti  sulip  anti  Banua.  Yanasa

LITANIA   NING  CALINIS-LINISAN  A  PUSU NANG  MARIA

Guinu,  pacaluluan  mu  cami.

Cristo, pacaluluan mu cami.

Guinu, pacaluluan mu cami.

Cristo,  pakiramdaman  mu  cami.

Cristo,  paca-pakiramdaman  mu  cami.

R. Dios  Ibpa  ning  Banua,  

pakaluluan  mu  cami   

R. Dios  Anac, Talapanatbus  ning  yatu,  pacaluluan  mu  cami.

R. Dios  Espiritu  Santo,  pacaluluan  mu  cami.  

R. Santa  Trinidad,  metung  a  Dios.  pacaluluan  mu  cami. 

R. Pusu  nang  Maria,  

V. Ipanalangin  mu  cami

R. Pusu  nang  Maria,  agpang  king  pusu  ning  Dios, 

V. Ipanalangin  mu  cami

R. Pusu  nang  Maria,  makayagum  king  Pusu  nang  Jesus,  

V. Ipanalangin  mu  cami

R. Pusu  nang  Maria,  dake  ning  Espiritu  Santo, 

V. Ipanalangin  mu  cami

R. Pusu  nang  Maria,  santungan  ning  Dibina  Trinidad,

V. Ipanalangin  mu  cami

R. Pusu  nang  Maria,  lulanan  ning  Dios  a  Mikatawan-tao, 

V. Ipanalangin  mu  cami 

R. Pusu  nang  Maria,  inmaculada  ibat  king  Kecang  pangalalang, 

V. Ipanalangin  mu  cami

R. Pusu  nang  Maria,  mitmu  king  grasya, 

V. Ipanalangin  mu  cami

R. Pusu  nang  Maria,  nuan  caring  sablang  pusu, 

V. Ipanalangin  mu  cami

R. Pusu  nang  Maria,  tronu  ning  ligaya, 

V. Ipanalangin  mu  cami

R. Pusu  nang  Maria,  sidsad  king  pacumbaban,

V. Ipanalangin  mu  cami

R. Pusu  nang  Maria,  sakripisyung  matatampus  king  api  ning  Divinung  Lugud, 

V. Ipanalangin  mu  cami

R. Pusu  nang  Maria,  makaugne  king  Cruz cambe  ning  Mipacung  Jesus

V. Ipanalangin  mu  cami

R. Pusu  nang  Maria,  kamasmas  ding  salunan, 

V. Ipanalangin  mu  cami

R. Pusu  nang  Maria,  santungan  ding  palpikasala,

V. Ipanalangin  mu  cami

R. Pusu  neng  Mana,  kapanayan  ding  magkasakit, 

V. Ipanalangin  mu  cami

R. Pusu  nang  Mania,  luklukan  ning  pakalulu, 

V. Ipanalangin  mu  cami

Cordero  ning  Dios  a  milalaco  king  casalanan  ning  yatu  Ginu,  patauaran  mu  cami

Cordero  ning  Dios  a  milalako  king  kasalanan  ning  yatu:  Ginu,  pakiramdaman  mu  cami   

Cordero  ning  Dios  a  milalako  king  kasalanan  ning  yatu:  Ginu,  pacalulwan  mu  cami, 

Cristo,  pakiramdaman  mu  cami.  

Cristo,  paka-pakiramdaman  mu  cami. 

V.  Mariang  Calinis-linisan,  mamu at mapa  kumbaba  puso 

R. Gawan  mo  ring  pusu  ming  agpang  king  Pusu  nang  Jesus 

Manalangin  tamu 

O lubus  mapamacalulung  Dios,  para  king  caligtasan  ding  palpicasala  at  santungan  ding malungcut,  ketula  Mu  king  ing  dalise  nang  Pusung  Maria  maging  bina  yang  cawangis ning pamakidamayan  nat  lunus  ning  Divinu nang  Pusu  ning  Kecang  Anac. y  Jesu-Kristo:  ipagkalub Mung icami  sanang  migaganaca  caniting  mayubu  at  mapalsintang  Pusu,  pauli  ding  meritu  at pamamilatan  na  niti  mu  ring  Nuan  a  Virgen,  mangayintulid  keng  mayakit  cawangis ning  Pusu nang  Jesus capamilatan  na  mu  ring  Kristong  Ginu  mi.  Amen.