Nanu ya ing Regina Coeli?

“MÁYAP A PASCUNG 

PÁNGASUBLÎNG MÉBIE NING DIOS PÛ! "-  (May the Blessing of God's Paschal Resurrection be Upon You). 

NANU YA ING REGINA COELI?

Ing antifonang Regina Coeli ("Reina ning Banua") metung ya caring apat a acasanayang antifonang parangal king Nuan a Virgen Maria, mipamalagiuanan lang Alma Redemptoris Mater, Ave Regina Coelorum, ampon Salve Regina ding atlu nang antifonang cayabe. I Papa Benedicto XIV (Calabing Apat) ing pepabal king ilibe ya ing Regina Coeli king Oracion kecaban ning Panaun ning Pangasubling Mebie canitang banuang Labing Pitung dalan Apat a pulu't Adua, a magmulang mipangadian king Domingo ning Pangasubling Mebie angga na king pamupus a Solemnidad ning Pamanipa ning Banal a Espiritu. Mipangadian ya iting manalacaran anting tagumpe nang Cristo king camatayan. Capara ning Oracion, mipangadian yang atlung ucdu aldo-aldo ing Regina Coeli, magmula king muclat sumala, king caugtuang aldo, angga na king sisilim, ban mitagulaling ya ing aldo king Dios ampon king Virgen Maria.

Ing tradicional a devoción a pangadian manibat king gatpanapun ning Sabado de Gloria anga na itang Octava ning Pentecostes. Pangadian ya iti makatlu aldo-aldo: alas 6 ning abak, alas 12 ning ugtu at alas 6 ning bengi, king balang pisamban, kumbentu, monasterio at balang baleng Katoliko Kapampangan.   

 REGINA COELI O REINA NING BANUA

Manungge: Tumula ca, O Reina ning Banua

Pakibat: Alleluya.

Manungge: Pauli na meging karapat- dapat kang mibait keya. 

Pakibat: Alleluya.

Manungge: Sinubli yang mebie anti ing guingcas na. 

Pakibat: Alleluya.

Manungge : Ipanalangin mu ke king Dios...

Pakibat: Alleluya.

Manungge: Magsaya ca at tumula O Virgen Maria...

Pakibat: Alleluya.

Manungge: Uling tutung sinubli yang mebie ing Ginu.

MANALANGIN TAMU

Dios a king uli ning pangasubli nang mebie ning Guinu min JesuCristong Anak mu, pigkaluban mu pung pepatulan ing mabilug a yatu; apaquirasan mi naman sang nabangnan ing ligaya ning bie alang capupusan king kapamilatan ning Virgen Mariang Indu na. King uli na naman JesuCristong Guinu mi. Yanasa

Iting matuang antifona migmula ya, agpang king casanayang patutu, canitang Canam a siglo; mipamatutuanan ya iti king metung a casulatang patutu ibat king mumuna nang dake ning Calabing Atlung siglo, iñia canitang miagum ya king Sinupang Panalangin king Aldo-aldo ding Franciscano.

Bibilugan de iti ring apat a mangacuyad a versos, a mapupus tunggal-tunggal king "alleluia". Cagum ning Regina Coeli, babalikid la ring maldang talasalpantaya, king Reina ning Banua, ban magsaya cambe na king Pamanyubli nang Mebie Cristo. 

Canitang Regina Coeli ning Lunes king Domingo ning Pangasibling Mebie banuang Aduang pulung dalan Labing Lima, mengamanu ya i Papa Francisco dikil king cararaptang para king caladua a macabie caring talasalpantaya cabang pangadian ya iting Panalangin king Nuan a Virgen Maria: "Caniting Panalangin, a mipasiuala king Alleluia, babalikid tamu cang Mariang daralauan tamung magsaya, pablasang ing bucud nang dela king keang sepupunan Sinubli yang Mebie anti ing pangacu na, ampon panibala ta la ring sarili tamu king macamal nang pamamilatan. King camatutuanan, ing tula tamu mayayaninag ya king tula nang Maria, ampat sininup nala layun pang sisinup mipnung casalpantayanan ding capaliarian king bie nang keralanan Jesua. Ulinita, pangadian taya iting panalangin king lubus manalacarang anac nang magsaya uli na ning tula ning carelang indu."

Eneru 13, 2021

Binaldug na king Amanung Sisuan

Cirilio Socorro: Sale ning Capasngauan

Ning Barrio Laug, Balen ning Mexico

Para king aguman ning DagísPisamban Kapampángan

Photo credits 📷 📸© to

John Andrew M. Ocampo

Fotografía SuánDalís

and in group partnership with

DagísPisambánKapampángan